Վճիռը ստանալուց հետո կքննարկենք բողոքարկման հիմքերը: Այս մասին լրագրողների հետ զրույցում ասաց ՍԴ դատավոր Հրայր Թովմասյանի փաստաբան Արամ Օրբելյանը:
«Այս պահին արդեն ունենք որոշակի հանգամանքներ, որի շրջանակներում արդեն իսկ գիտենք՝ բողոքարկման ենթակա է, այդ թվում՝ դատավարության ընթացքում տեղի ունեցած բոլոր խախտումները ևս կարող էին ազդել վճռի վրա: Երբ կունենանք դատավճիռը, արդեն բովանդակային կկարողանանք գնահատել նաև հավելյալ հիմքերը»,- ասաց նա:
Հարցին՝ դադարեցվելո՞ւ է Թովմասյանի՝ ՍԴ դատավորի լիազորությունները, նա պատասխանեց, որ քանի դեռ համապատասխան վճիռն ուժի մեջ չի մտել, տվյալ դատավճիռը ոչ մի հետևանք չի կարող առաջացնել:
«Վճիռը կարող ենք բողոքարկել մենք, կարող է բողոքարկել մեղադրող կողմը: Եթե նկատեցիք, ըստ էության, 19 թիվ բերվեց: Մեղավոր է ճանաչվել 380-րդ հոդվածի 1-ին մասով, մեղադրանքն առաջադրված է եղել 380-րդ հոդվածի 2-րդ մասով: Մեղադրանքն առաջադրված է եղել 20 թվականին: Այսինքն, ավելի ուշ քան համապատասխան վաղեմության ժամկետներն անցել են, ինչը բացարձակ հիմք էր, որ նույնիսկ մեղադրանք չառաջադրվեր»,- ասաց նա:
Օրբելյանը նշեց, որ եթե հիմա վերջնական դատավճիռը այս ձևով ուժի մեջ մտնի, համապատասխանաբար քննարկման հարց է դառնում պաշտոնավարման շարունակությունը:
«Այս վճիռը, այս տեքստը, որ ունենք այսօրվա դրությամբ, որևէ անմիջական հետևանք չի առաջացնում՝ բացառությամբ պարոն Թովմասյանի գույքի վրա դրված կալանքի մի մասի վերացումը, որովհետև այս պահին ավելի մեծ գումարի չափով է արգելանք դրված: Հետևանքներ կունենա, եթե չբողոքարկվի ու ուժի մեջ մտնի, կամ բողոքարկվի մնա ուժի մեջ կամ փոփոխվի»,- պարզաբանեց նա:
Հիշեցնենք, որ Հրայր Թովմասյանը մեղավոր ճանաչվեց դատարանի կողմից, սակայն քրեական պատասխանատվությունից ազատվեց վաղեմության ժամկետն անցնելու հիմքով:
