Համայնքներում ցանկացած խնդիր լուծելի է, եթե կան սրտացավ, համայնքին ու ժողովրդին նվիրյալ, փորձառու ղեկավարներ։ Այս մասին իր ֆեյսբուքյան էջում գրել ու կից տեսանյութ է հրապարակել «Ապրելու երկիր» կուսակցության նախագահ, Երևանի քաղաքապետի թեկնածու Մանե Թանդիլյանը։
«Ալավերդիի ղեկավարումը ստանձնելուց հետո մեր թիմակից Արկադի Թամազյանի նախաձեռնությամբ արդյունավետորեն լուծվել են մի շարք խնդիրներ, ինչի մասին հենց բնակիչներն են փաստում։ Իսկ որպես առաջնային հիմնահարց՝ տրանսպորտային ցանցի արդիականացումը մշտապես եղել է մեր ուշադրության կենտրոնում։
Արդյունքը՝ մեր սիրելի Ալավերդի համայնքն արդեն նոր միկրոավտոբուսներ ունի. դրանց մի մասն արդեն պատրաստ է սպասարկելու բնակիչներին, ապահովելու նրանց հարմարավետ և ժամանակին տեղաշարժը։
«Ապրելու երկիրը» սկսվում է համայնքներից. ապրելու պետք է դառնա յուրաքանչյուրիս համայնքը, գյուղը, քաղաքն ու միջավայրը։ Այսպիսին է ապրելու երկիր կառուցելու մեր տեսլականն ու ռազմավարությունը»,- գրել է քաղաքական գործիչը։
