Չեչնիայի ղեկավար Ռամզան Կադիրովը դիմել է ուկրաինական հետախուզությանն այն բանից հետո, երբ տեղեկություններ են հայտնվել, որ իր ընկերը՝ ՌԴ Պետդումայի պատգամավոր Ադամ Դելիմխանովը վիրավորվել է Ուկրաինայում՝ հատուկ ռազմական գործողության գոտում։ Համապատասխան հաղորդագրությունը հրապարակվել է նրա տելեգրամյան ալիքում։
«Ես խնդրում եմ ուկրաինական հետախուզությանը տեղեկություն տրամադրել, թե կոնկրետ որ տեղին և որ դիրքերին են հարվածներ հասցվել, որպեսզի, ամեն դեպքում, գտնեմ իմ սիրելի եղբորը»,- գրել է Կադիրովը։
Նա պարզաբանել է, որ չի կարողանում կապ հաստատել Դելիմխանովի հետ և պարգևատրում է խոստացել օգնության համար։
Նշենք, որ համացանցում լուրեր են նաև տարածվում Դելիմխանովի զոհվելու մասին, չնայած նրան, որ ռուսական կողմն արդեն հերքել է այս տեղեկությունները։
Այսպես, ՌԴ խորհրդարանի ստորին պալատի մամուլի ծառայության աղբյուրը «Զվեզդա» հեռուստաալիքին հայտնել է, որ պատգամավորը վիրավորվել է հատուկ ռազմական գործողության գոտում, իսկ Mash տելեգրամյան ալիքի հաղորդմամբ՝ Դելիմխանովը գտնվում է բժիշկների հսկողության տակ։
