Սիսիանում «Քաղաքացիական պայմանագիր» կուսակցությունը ՏԻՄ ընտրություններում հաստատ պարտվելու է: Այսպիսի եզրակացություն ենք անում՝ հիմնվելով նախադեպերի վրա:
Այսպես. 2021 թվականին, երբ Գորիսում ՏԻՄ ընտրություններ էին , Տիգրան Ավինյանը գնացել էր Գորիս և ՔՊ համայնքի ղեկավարի թեկնածու Վլադիմիր Աբունցի հետ շրջել Գորիսի փողոցներով՝ մաղթելով նրան հաջողություն ընտրություններում: Աբունցը պարտվեց ընտրություններում:
Այնուհետև Տիգրան Ավինյանը գնաց Տաթև, որտեղ ՏԻՄ ընտրություններում «Քաղաքացիական պայմանագիր» կուսակցության առաջադրած թեկնածուի հետ մասնակցեց բնակիչների հետ հանդիպմանը: Տաթևում ՔՊ թեկնածուն պարտվեց:
Սակայն, Տիգրան Ավինյանը չհանձնվեց և Մեղրիում էլ որոշեց օգնել ՔՊ-ի թեկնածուին՝ նորից մասնակցելով ընտրողների հետ հանդիպմանը։ Արդեն պարզ է, որ Մեղրիում էլ ՔՊ-ն պարտվեց:
Օրեր առաջ Տիգրան Ավինյանը գնացել է Սիսիան, որպեսզի օգնի ՔՊ-ի թեկնածու Արմեն Հակոբջանյանին:
Այստեղ Ավինյանը մասնակցել է քարի վերամշակման արտադրամասի վերագործարկման միջոցառմանը։
ՖԲ իր էջում գրել է, թե արտադրամասը կարող է ապահովել մինչև 100 աշխատատեղ, մարզերն էլ կարող են զարգանալ, տնտեսությունը կվերափոխվի, ամեն ինչ, ինչպես միշտ, ապառնի ժամանակով, կարճ ասած, «ապագա կա»:
Այս անգամ Տիգրան Ավինյանը հրապարակավ հաջողություն չի մաղթել ՔՊ Սիսիանի թեկնածուին՝ հաշվի առնելով վերոնշյալ դառը փորձը, այդուհանդերձ, մենք կարծում ենք, որ դա չի փրկելու Արմեն Հակոբջանյանին պարտվելուց:
Ասում են, որ ՏԻՄ-երում, երբ ՔՊ առաջին համարները տեղեկանում են, որ Երևանից գալիս են իրենց քարոզարշավում օգնելու, խնդրում են, որ հանկարծ Ավինյանին չուղարկեն:
Ի դեպ, վաղվանից էլ սկսվելու է Երևանի ՏԻՄ ընտրություններում ՔՊ-ի պարտությունը, քանի որ Երևանի ավագանու նիստի օրակարգում ընդգրկված է Տիգրան Ավինյանին փոխքաղաքապետ նշանակելու հարցը:
