ԱԺ լիագումար նիստում արձագանքելով ՔՊ-ական պատգամավոր Վիգեն Խաչատրյանի որակումներին, ԱԺ նախագահ Ալեն Սիմոնյանը հայտարարել էր, թե ի թիվս այլոց՝ եկեղեցականները եւս մոտիկից կծանոթանան իրենց կողմից արված համապատասխան հետեւություններին:
«Ժամանակին որոշ ընկերություններ, շոու բիզնեսի աստղերը վախենում էին ծպտուն հանել, եկեղեցականները վախենում էին քիթը մարտի 1-ից սկսած իրենց սև քողերի տակից հանեին, մենք էինք «մեղավոր»…Ոչինչ ես վստահ եմ, որ հետևություններ կարվեն, եւ վստահ եմ, որ այդ բոլոր խավերը նույնպես այդ հետեւություններին շատ մոտիկից կծանոթանան»,-ասել էր ԱԺ նախագահը:
Aravot.am-ը Մայր Աթոռի տեղեկատվական համակարգի ղեկավար տեր Եսայի քահանա Արթենյանից հետաքրքրվեց, թե ինչ կարծիքի են խորհրդարանում արված այս հայտարարության վերաբերյալ: «Անընդունելի եւ ԱԺ նախագահի հանգամանքին անհարիր ենք նկատում եկեղեցականների և այլոց վերաբերյալ իր հայտարարության մեջ գործածած բառամթերքը և հնչեցրած սպառնալիքները»,-մեր հարցմանն ի պատասխան փոխանցեց Մայր Աթոռի տեղեկատվական համակարգի տնօրենը։
