«Հրթիռներ և մեղադրանքներ, մինչդեռ Լեռնային Ղարաբաղը երկրորդ շաբաթն է, ինչ կրակների մեջ է». CNN-ի անդրադարձն ամերիկահայերի զանգվածային ցույցերից հետո

Կալիֆոռնիայի հայ համայնքի ներկայացուցիչների՝ մի քանի օր շարունակվող ցույցերից հետո ամերիկյան խոշորագույն CNN հեռուստաալիքն անդրադարձել է Արցախում տեղի ունեցող ռազմական բախումներին:

«Լեռնային Ղարաբաղում վերսկսված հակամարտության երկրորդ շաբաթն է ընթանում, մինչ Հայաստանն ու Ադրբեջանը մեղադրում են միմյանց քաղաքացիների դեմ հրթիռային հարվածներ իրականացնելու մեջ»,- գրում է CNN-ը՝ հավելելով, որ Ստեփանակերտն ինտենսիվ հրթիռակոծման է ենթարկվել երկուշաբթի:

Նշենք, որ նախօրեին հայ համայնքը խոշոր բողոքի ցույց էր անցկացրել Կալիֆոռնիայի Ֆրեզնո քաղաքում: Բացի այդ, ամերիկահայերը մի քանի օր շարունակ փակում էին Լոս Անջելեսի Սանսեթ փողոցը, որտեղ գտնվում է CNN-ի կենտրոնակայանը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 4-ի դրությամբ Արցախի զինուժը խոցել է հակառակորդի՝ 14 ուղղաթիռ, 17 ինքնաթիռ, 124 անօդաչու թռչող սարք, 368 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 3154 զոհ, ավելի քան 5270 վիրավոր։ Հայկական կողմից, նախնական տվյալներով, կա 230 զոհ։

Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում վիրավորվել է 80 քաղաքացիական անձ, զոհվել՝ 19 մարդ, վնասվել՝ մոտ 2700 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։