9/46 ընտրատեղամասում ոստիկանները տեղաշարժել են ընտրական գործընթացի հետ որևէ առնչություն չունեցող պահարան: Այս մասին ֆեյսբուքյան իր էջում գրել է ՀՀ ոստիկանության լրատվության եւ հասարակայնության հետ կապերի վարչության պետ Աշոտ Ահարոնյանը՝ անդրադառնալով «Երկիր ծիրանի» կուսակցության նախագահ, Երեւանի ավագանու թեկնածու Զարուհի Փոստանջյանի հայտարարությանը, ըստ որի 9/46 ընտրատեղամասում ծառայություն կատարող ոստիկանները տեղաշարժել են Երեւանի ավագանու ընտրությունների քվեաթերթիկների չհրկիզվող պահարանը:
Նա, մասնավորապես, գրել է.
«Երկիր ծիրանի» կուսակցության ներկայացուցիչ Զարուհի Փոստանջյանը երեկ հայտարարություն է տարածել, թե 9/46 ընտրատեղամասում ծառայություն կատարող ոստիկանները տեղաշարժել են Երեւանի ավագանու ընտրությունների քվեաթերթիկների չհրկիզվող պահարանը:
Ստուգմամբ պարզվել է, որ ոստիկանները տեղաշարժել են մեկ այլ՝ ընտրական գործընթացի հետ որեւէ առնչություն չունեցող պահարան:
Այս իրողությունը հաստատել է նաեւ ընտրությունների մասնակից «Ելք» դաշինքը:
