Մոսկվայի առևտրի և ծառայությունների վարչության ղեկավար Ալեքսեյ Նեմերյուկը ՌԴ-ում Հայաստանի դեսպան Վարդան Տողանյանի հետ քննարկել է «Ֆուդ Սիթի» շուկայում ստեղծված իրավիճակը՝ կապված հայկական ապրանքների արգելքի հետ: Այս մասին РИА Новости-ին հայտնել է ինքը պաշտոնյան:
«Ես դեսպանի հետ զրուցել եմ, ոչ մի խնդիր չկա, ծիրանները բոլորը վաճառվել են, իսկ «Ֆուդ Սիթի» այսօր 3 բեռնատար է մտել, նրանց մոտ ոչ մի խնդիր չկա»,- ասել է Նեմերյուկը:
ՌԴ-ում ՀՀ դեսպան Վարդան Տողանյանն ավելի վաղ հայտնել էր, որ դեսպանությունը դիմել է Մոսկվայի իշխանություններին հայկական ապրանքները շուկա չթողնելու շուրջ ստեղծված իրավիճակը կարգավորելու խնդրանքով: Նրա խոսքով՝ նախօրեին հայկական գյուղատնտեսական մթերքով 50 բեռնատար արգելափակված է եղել շուկայի տարածքում:
Հիշեցնենք, որ երեկ РБК-ի հետ զրույցում ՀՀ դեսպանը հայտնել էր, որ դիվանագիտական ներկայացուցչության աշխատակիցներն այցելել էին «Ֆուդ Սիթի» շուկա, որպեսզի պարզեն, թե ինչ է այնտեղ կատարվում, սակայն նրանց դուրս էին արել տարածքից:
Հուլիսի 16-ի գիշերը Մոսկվայի ամենամեծ մեծածախ շուկաներից մեկից՝ «Ֆուդ Սիթի» գյուղատնտեսական ապրանքների շուկայից հանել էին հայկական ապրանքներով բեռնված մեքենաները:
РИА Новости-ի փոխանցմամբ՝ շուկան պատկանում է «Կիևսկայա պլոշչադ» ընկերությանը, որը ղեկավարում է Մոսկվայում խոշորագույն կոմերցիոն անշարժ գույքի գործակալություններից մեկի սեփականատերերի՝ Գոդ Նիսանովի և Զարախ Իլիևի ակտիվները:
