2006թ. հունիսի 15-ին Հայաստանի Հանրապետության Ազգային ժողովը ընդունեց նոր՝ «Հայաստանի Հանրապետության պետական դրոշի մասին» օրենքը և այդուհետ հունիսի 15-ը համարվում է ՀՀ դրոշի պետական օր: Հայաստանի դրոշն ընդունվել է Հայաստանի Հանրապետության Գերագույն խորհրդի կողմից 1990թ. օգոստոսի 24-ին և այն իր չափերով և գույներով Հայաստանի առաջին հանրապետության դրոշի կրկնությունն է հանդիսանում, որի հեղինակը ՀՀ առաջին վարչապետ Հովհաննես Քաջազնունին է։
ՀՀ դրոշը երեք հավասար հորիզոնական հավասարաչափ զոլերով ուղղանկյուն պաստառ է՝ լայնքի և երկայնքի 1։2 հարաբերակցությամբ, վերևում` կարմիր, մեջտեղում` կապույտ, ներքևում` նարնջագույն:
«Կարմիր գույնը խորհրդանշում է Հայկական բարձրավանդակը, հայ ժողովրդի մշտական պայքարը հարատևման, քրիստոնեական հավատքի, Հայաստանի անկախության և ազատության համար։
Կապույտ գույնը խորհրդանշում է հայ ժողովրդի ապրելու կամքը խաղաղ երկնքի ներքո։
Նարնջագույնը խորհրդանշում է հայ ժողովրդի արարչական տաղանդը և աշխատասիրությունը»
