«Կորոնավիրուսի համաճարակի ցուցանիշները Հայաստանում կայունացման թույլ նախանշաններ են ցույց տալիս, իհարկե, մենք վերջնական չենք կարող արձանագրել, որ իրավիճակը մեզ մոտ կայունացել է, բայց այդպիսի նախանշաններ կան»: Այս մասին այսօր պարետատան ճեպազրույցի ժամանակ ասաց ՀՀ վարչապետ Նիկոլ Փաշինյանը:
Վարչապետը նշեց, որ, պարետատան, Կառավարության և առողջապահության նախարարության գործադրած ընդհանուր ջանքերի շնորհիվ իրավիճակը դառնում է տանելի: «Ըստ էության՝ մենք հոսպիտալացման կարիք ունեցող քաղաքացիների խնդիրը տեսնում ենք, որ ամեն օրվա հետ ավելի փոքրանում է: Եվ եթե մենք միասին պահպանենք այս միտումը, առաջինը կլուծենք հոսպիտալացման հետ կապված խնդիրներն ամբողջ ծավալով ու կանցնենք կորոնավիրուսի համաճարակի հաղթահարման, ավելի ճիշտ՝ զրոյացման փուլին»:
Ըստ նրա՝ այս ամենը տեղի կունենա, եթե համաճարակային կանոնները խստիվ պահպանվեն և հիմա ակնհայտ է, որ ՀՀ քաղաքացիների մեծամասնությունը կրում է դիմակ ու պահպանում կանոնները, բայց դեռ ցանկալի արդյունք չունենք: Վարչապետը շեշտեց՝ այսօր ամբողջ Հայաստանում օրվա առաջին կեսի դրությամբ ոստիկանները տուգանել են 1800 քաղաքացու՝ դիմակ կրելու կանոնները չպահպանելու համար:
«Այս թիվը ես ցավով եմ ասում, մեր նպատակը որևէ մեկին տուգանելը չէ: Իշխանության խնդիրն է այս ձևով հստակ ուղերձ հղել, որ հակահամաճարակային կանոնների նկատմամբ հսկողությունը՝ գնալով խստանալու է, և քաղաքացիներն իրենք պահպանեն կանոնները, ոչ թե տուգանվելու վախից կամ տհաճությունից, այլ որ այդպես պահպանեն իրենց, հարազատների և այլ քաղաքացիների առողջությունը»:
