Պետական պաշտոնյաների պարգևատրումների հետ կապված դեռևս ամիսներ առաջ տեղի ունեցած սկանդալի ժամանակ պաշտպանել եմ դիրքորոշումը, որ պաշտոնյաները պետք է ստանան արժանապատիվ վարձատրություն, և այդ պաշտոնյաների աշխատավարձերի բարձրացումը նախատեսված է եղել բյուջեով, որն ընդունել է Ազգային ժողովը, գրում է Tert.am-ը։
ԱԺ-ում այս մասին հայտարարեց վարչապետ Նիկոլ Փաշինյանը՝ պատասխանելով «Լուսավոր Հայաստան» խմբակցության ղեկավար Էդմոն Մարուքյանի հարցին, թե ինչու է նախարարների և փոխնախարարների վարձատրությունը գաղտնի որոշմամբ բարձրացվել, ինչի մասին տեղեկացրել էր «Հետք» պարբերականը։
Էդմոն Մարուքյանը նշեց, որ այդ որոշմամբ, ըստ էության, վարչապետը շրջանցել է պետական պաշտոնյանների վարձատրության մասին օրենքը և ընդունված սանդղակը և բարձրացրել է 3 սուբյեկտների աշխատավարձը: «Առանց խորհրդարանի, կառավարությունը չի կարող կամ որևէ այլ մարմին պաշտոնայնների աշխատավարձերի սանդղակը փոխել»,- ասաց Մարուքյանը և նշեց, որ դա արվել է գաղտնի: «Ինչո՞ւ է այդպես որոշվել և ինչո՞ւ օրենքր չի վերաբերվել խորհրդարանին»,-ասաց նա:
Նիկոլ Փաշինյանը պատասխանեց, որ այդ որոշման արդյունքում Էդմոն Մարուքյանի նշած ոչ բոլոր սուբյեկտների աշխատավարձերն է բարձրացել, ոմանցը նույնիսկ իջել է: «Անցած տարի պարգևատրումային սկանդալի արդյունքում արձանագրել ենք, որ որոշակի «դիսպրոպորցիա» կա, և արդյունքում ոմանցը բարձրացել է»,- ասաց նա:
Նիկոլ Փաշինյանն ասաց, որ օրենքը վաղուց, ըստ էության, այդպես չի գործում և այդ սանդղակը վաղուց է խախտվել: «Մենք պրոցեսը արել ենք հրապարակային, ասել եմ, որ եթե նախկինում պարգևատրումային ֆոնդ ունեն մի քանի մարմիններ, մենք հիմա աշխատավարձային ֆոնդի 30 տոկոսի չափով բոլոր մարմինների համար պարգևատրումային ֆոնդ ենք սահմանում և բյուջետային քննարկումներին դրա մասին խոսել ենք և քվեարկել եք: Նաև հայտարարել եմ, որ ԱԱԾ, ոստիկանության այլ մարմիններում այդ պարգևավճարումներով աշխատավարձերը փաստացի բարձրացրել ենք: Որ ասում եք առանց օրենքի փոփոխության՝ ԱԺ-ն ընդունել է բյուջե, որում այս գումարները նախատեսված են եղել, որևէ ուրիշ տեղից փող չենք կտրել ու աշխատավարձերը ավելացրել, այլ այն հոդվածից է, որը դուք ընդունել եք»,-ասաց նա և նշեց, որ այդ որոշումը կայացվել է նախ, որպեսզի հավասարություն լինի և պաշտոնյան այդ անհարմար վիճակից դուրս գա, երբ պաշտոնյան ինքն իրեն պարգևատրում է նշանակում:
«Մենք համարել ենք, որ բավարար չափով հանրության հետ քննարկում ենք ունեցել, որպեսզի այդ հարցը մենք լուծենք»,- հավելեց Փաշինյանը:
Էդմոն Մարուքյանն արձագանքեց, թե այդ դիտարկումների հետ համաձայն են, համաձայն չեն, որ 30 տոկոսից բարձր է եղել բարձրացումը : «Կրկնապատկվել են այդ աշխատավարձերը, բայց մենք երբ հաստատել ենք ֆոնդը՝ մտածել ենք 30 տոկոսի մասին է խոսքը»,- ասաց Մարուքյանը և հարցրեց, թե ինչու է «գաղտնի» գրիֆով արվել դա:
Վարչապետ Փաշինյանը նշեց, որ խոսել նախարարի վճարի գաղտնիության մասին տեղին չէ, որովհետև պաշտոնյանները հայտարարագիր են ներկայացնում: Նիկոլ Փաշինյանը շարունակեց, թե հետո նախարարությունների կրճատում է եղել և նախարարներ կան երեք նախարարությունների աշխատանք են կատարում:
Նիկոլ Փաշինյանը նաև ասաց, որ այլ սկզբունք էլ է առաջարկվել, որ ոչ թե պարգևատրումները լինեն ավտոմատ, այլ հայեցողական, որպեսզի լավ աշխատողին նախարարները կարողանան խրախուսել, վատին՝ ոչ: