SHAMSHYAN.com-ի տեղեկություններով՝ քիչ առաջ հերթական հետապնդումն է տեղի ունեցել Ազգային ժողովի պատգամավոր Քրիստինե Պողոսյանի նկատմամբ:
Ինչպես հայտնում է ֆոտոլրագրող Գագիկ Շամշյանը, Ք. Պողոսյանը, ով «Իմ քայլը» դաշինքից ընտրված պատգամավոր է, իր Mini cooper մակնիշի 018 HH 11 համարանիշի ավտոմեքենան կայանել է Դեմիրճյան փողոցում՝ Ազգային ժողովի շենքի հարևանութամբ, թույլատրելի հատվածում և որոշ ժամանակ անց դուրս գալով ԱԺ-ից, իր ավտոմեքենան հայտնաբերել է ծալապակասի կամ ծալապակասների կողմից վնասված:
Թուլամորթը կամ թուլամորթները վնասել են պատգամավորի ավտոմեքենայի ապակիները ու իրենց սև գործն ավարտելով՝ հեռացել են: Այս պահին դեպքի վայրում աշխատում են ոստիկանության Արաբկիրի բաժնի օպերատվ խումբը՝ բաժնի պետի տեղակալի գլխավորությամբ: Փաստի առթիվ հետաքննչական բաժանմունքում նյութեր են նախապատրաստվում:
Ֆոտոլրագրողը հայտնում է, որ սա առաջին դեպքը չէ, երբ պատգամավորի ավտոմեքենան նման վիճակի են հասցնում, իսկ պատգամավորը աչքի է ընկում իր սկզբունքայնությամբ, ակտիվ գործունեությամբ և SHAMSHYAN.com-ը բազմաթիվ անգամներ ականատես է եղել, թե ինչպես է պատգամավորը օգնության հասնում խնդիրներ ունեցող քաղաքացիներին: Նմանատիպ մի քանի դեպքերի մասին SHAMSHYAN.com-ը նաև հրապարակումներ է արել:
Ինչպես ավելի վաղ հայտնել էր SHAMSHYAN.com-ը, հունվարի 21-ին, արտակարգ դեպք էր տեղի ունեցել Երևանում: Ժամը 19:30-ի սահմաններում Հյուսիսային պողոտայում՝ Տերյան 25 հասցեի բակում, անհայտ անձը կամ անձինք կոտրել էին Mini cooper մակնիշի 33 QP 313 համարանիշի ավտոմեքենայի ապակին և վնասել ավտոմեքենան: Դեպքի վայր էին ժամանել ոստիկանության կենտրոնական բաժնի ծառայողները:
Գ. Շամշյանի տեղեկություններով՝ նշված ավտոմեքենան պատկանում է «Իմ քայլը» դաշինքից ընտրված Ազգային ժողովի պատգամավոր Քրիստինե Պողոսյանին, ով կատարվածի մասին տեղեկացել էր:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
