2006 թվականից ի վեր Հայաստանում մալարիայի տեղական դեպքեր չեն արձանագրվել


2006 թվականից ի վեր Հայաստանում մալարիայի տեղական դեպքեր չեն արձանագրվել
Ապրիլ 25 18:08 2019

Առողջապահության համաշխարհային կազմակերպության (ԱՀԿ) կողմից ապրիլի 25-ը հռչակվել է Մալարիայի համաշխարհային օր, որը նշվում է 2007 թվականից: Այս տարվա կարգախոսն է. «Զրո մալարիան սկսվում է ինձնից»:

Մալարիայի դեմ պայքարում ավելի քան մեկ տասնամյակի կայուն առաջընթացը դադարել է: ԱՀԿ-ի մալարիայի համաշխարհային իրավիճակի վերջին զեկույցի համաձայն՝ 2015-ից մինչև 2017 թվականը մալարիայի դեպքերի նվազեցման հարցում որևէ նշանակալի ձեռքբերում չի արձանագրվել: 2017 թվականին գրանցվել է մալարիայից մահվան 435 000 դեպք, ինչն անցյալ տարի գրեթե անփոփոխ է մնացել:

2015 թվականի մայիսին Առողջապահության համաշխարհային վեհաժողովը հավանություն է տվել մալարիայի 2016-2030 թվականների գլոբալ ռազմավարությանը, որը հավակնոտ նպատակներ է սահմանել` 2030 թվականին առնվազն 90%-ով նվազեցնել մալարիայի հիվանդացությունը և մահացությունը, վերացնելով մալարիան առնվազն 35 երկրում, և կանխել մալարիայի կրկին արմատավորումն այն երկրներում, որոնք ազատ են մալարիայից:

Մալարիայի դեմ պայքարում գլոբալ առաջընթաց արձանագրելու համար հրատապ գործողություններ են անհրաժեշտ և մարտահրավերներն առավելապես ուղղված են մալարիայից առավել տուժած երկրներին:

Այս տարի Մալարիայի դեմ պայքարի համաշխարհային օրն ԱՀԿ-ն հայտարարում է հիվանդության ետմղման ծրագիր՝ մինչև մալարիայի վերջը: Աֆրիկյան Միության և այլ գործընկեր կազմակերպությունների նախաձեռնությամբ մեկնարկել են «Զրո մալարիան սկսվում է ինձնից» խորագրով քարոզարշավը, որի նպատակն է քաղաքական օրակարգում բարձրացնել մալարիայի դեմ պայքարը, նպատակաուղղել հավելյալ ռեսուրսներ և հզորացնել համայնքների՝ մալարիայի դեմ պայքարի և կանխարգելման նախաձեռնությունը:

2016 թվականին ԱՀԿ-ի Եվրոպական տարածաշրջանը հայտարարվել է աշխարհում մալարիայից լիովին ազատ առաջին տարածաշրջանը: Սա մեծ ձեռքբերում է Եվրոպական տարածաշրջանի և համաշխարհային հանրության համար՝ մալարիայի էլիմինացիայի (վերացման) պայքարում: Այնուամենայնիվ՝ հիվանդության վերադարձի վտանգը դեռ մնում է, քանի որ մեծ է այլ տարածաշրջաններից բերովի դեպքերի թիվը: Քաղաքական հանձնառություն և արդյունավետ համաճարակաբանական հսկողություն է անհրաժեշտ՝ պահպանելու ձեռք բերված արդյունքները:

2006 թվականից ի վեր Հայաստանում մալարիայի տեղական դեպքեր չեն արձանագրվել և 2011 թվականին Առողջապահության համաշխարհային կազմակերպությունը Հայաստանի Հանրապետությունը վկայագրել է որպես մալարիայից ազատ տարածք:

Այսօր Մալարիայի համաշխարհային օրվա կապակցությամբ մեր համերաշխությունն ենք հայտնում աշխարհում մալարիայի դեմ պայքարող բոլոր ուժերին և հույս հայտնում համատեղ ջանքերով ապահովելու մալարիայի կրկին արմատավորման կանխարգելումը Հայաստանում:



loading...