Վահագն Հարությունյանի նկատմամբ իրականացվող հետախուզումն ապօրինի է։ Այս մասին ArmDay.am-ի հետ զրույցում ասաց ասաց փաստաբան Միհրան Պողոսյանը:
Փաստաբանի խոսքով՝ օրենքի հիման վրա չի կայացվել որոշումը, այդ իսկ պատճառով բողոքարկել են տվյալ որոշումը դատախազին և մերժում ստանալով՝բողոքարկել են նաև դատարանում և այժմ դատական քննություն է իրականացվում տվյալ որոշման հետ կապված:
Միհրան Պողոսյանը չցանկացավ մեկնաբանել ՀՔԾ խոսնակի պարզաբանմանը, որտեղ ասվում, որ մեղադրյալի նկատմամբ հետախուզում հայտարարելը կապված չէ մեղադրյալի նկատմամբ խափանման միջոց ընտրելու կամ չընտրելու հանգամանքի հետ:
«Ես չգիտեմ՝ ինչ է փոխվել ՀՀ-ում, սակայն սևով սպիտակի վրա գրված օրենքի նորմերը, ով ինչպես ցանկանում, մեկնաբանում է: Չգիտեմ, թե ինչ մեկնաբանություններ են տվել: ՀՔԾ մամուլի խոսնակը Քրեական դատավարության օրենսգրքով քրեական դատավարությանը մասնակցող անձից կիլոմետրերով հեռու է գտնվում: Խորհուրդ կտամ քննիչին, ով զբաղվում է տվյալ գործով, ընդհանրապես չհետևեն մամուլի խոսնակի տված պարզաբանումներին»,-ասաց փաստաբանը:
Հիշեցնենք, որ Վահագն Հարությունյանն այս տարվա հուլիսին ազատվել էր Քննչական կոմիտեի նախագահի տեղակալի, հատկապես կարևոր գործերի քննության գլխավոր վարչության պետի պաշտոնից:
