«Մուլտի Ուելնես» կենտրոնը դատական կարգով վիճարկում է Երևանի քաղաքապետարանի որոշումը, որով օրերս ընկերությանը զրկել էին կառուցապատման իրավունքից և տարածքն անցել էր համայնքին:
«Դատալեքս»-ից տեղեկանում ենք, որ «Մուլտի Ուելնեսի» ներկայացուցիչը դատարանից խնդրում է անվավեր ճանաչել հունիսի 8-ին Երևան քաղաքապետի կողմից կատարած գործարքը, որով քաղաքապետարանը միակողմանիորեն դադարեցրել է ԲՀԿ առաջնորդ, գործարար Գագիկ Ծառուկյանի հետ կնքած պայմանագիրը:
Գագիկ Ծառուկյանի փաստաբանը դատարանից պահանջում է նաև անվավեր ճանաչել Կադաստրի որոշումը, որով այս հուլիսի 14-ին դադարեցվել է «Մուլտի Վելնեսի» կառուցապատման իրավունքը և գույքն ամբողջությամբ գրանցվել է որպես Երևան համայնքի սեփականություն: Կադաստրից չեն մեկնաբանում իրենց որոշումը:
Գործը մակագրվել է դատավոր Արշակ Պետրոսյանին, նիստի օրը դեռ հայտնի չէ:
Հիշեցնենք՝ Երևանի քաղաքապետարանը լուծել էր «Մուլտի Ուելնեսի» վարձակալության պայմանագիրը:
Երևանի քաղաքապետ Տիգրան Ավինյանն էլ հայտարարել էր նախկին «Մուլտի Ուելնես» (Multi Wellness) առողջարանային համալիրի վերաբացման մասին: Քաղաքապետը դիմել էր բնակիչներին՝ տեղեկացնելով, որ համալիրն արդեն իսկ գործում է և պատրաստ է սպասարկել այցելուներին:
