ՀՀ վարչապետ Նիկոլ Փաշինյանի շրջայցը Երևանի մետրոպոլիտենում չի անցել առանց միջադեպերի։ Սոցցանցերում և լրատվամիջոցներում լայնորեն տարածվել է տեսանյութ, որտեղ երկրի ղեկավարը բանավեճի է բռնվում արցախցի մի երիտասարդ աղջկա հետ։
Տեղի ունեցածը դարձել է թեժ քննարկումների առարկա։ Հասարակական գործիչներն ու հայտնիները բաժանվել են երկու ճամբարի՝ քննադատելով կողմերի պահվածքը։ Իրավիճակը հարթելու նպատակով Նիկոլ Փաշինյանը հանդես է եկել տեսաուղերձով, որում ներողություն է խնդրել տեղի ունեցած միջադեպի և հնչած արձագանքների համար։
Սակայն վարչապետի զղջումը ոչ բոլորի կողմից է ընդունվել որպես անկեղծ քայլ։
Հանրային հայտնի դեմքերից իր դժգոհությունն առավել կոշտ ձևով է արտահայտել հաղորդավար Արա Ղազարյանը։
Նա իր սոցիալական էջում դիմել է վարչապետին՝ չխորշելով օգտագործել խիստ որակումներ. «Դու անհավասարակշռված ես, քեզ մի փոքր բիզնես չի կարելի վստահել, ուր մնաց երկիր․․․ Ներողությունդ փաթաթիր ու քեզ պահիր․․»
Արա Ղազարյանի այս գրառումը վայրկյանների ընթացքում հազարավոր հավանումներ և մեկնաբանություններ է հավաքել՝ արտացոլելով հասարակության մի հատվածի ծայրահեղ բացասական վերաբերմունքը տեղի ունեցող իրադարձությունների նկատմամբ։
