«Կամք» շարժման անդամները Բաքվում գտնվող հայ գերիների ազատ արձակման պահանջով կրկին կառավարության շենքի դիմաց նստացույց են իրականացնում։
Aysor.am-ի հետ զրույցում ակցիայի նախաձեռնողներից Արման Մխիթարյանն ի պատասխան այն հարցին, թե արդյո՞ք պահանջի համար կառավարությունը ճիշտ հասցեատեր է՝ պատասխանեց. «Այո՛, ճիշտ հասցեատիրոջ է ուղղված, որովհետև ՀՀ-ում հարցերը լուծում է ՀՀ կառավարությունը, ոչ օտարերկրյա դեսպանատությունը կամ այլ միջազգային կազմակերպություններ։ Հենց կառավարությունն է իրավազոր բանակցելու և այդ հարցը բարձրացնելու։ Իհարկե, ինչ-որ կազմակերպություններ, ՀԿ-ներ փորձում են ինչ-որ բան անել, բայց հիմնական գործիքակազմը տրված է կառավարությանը և այն, որ ոչինչ չի անում, ակնհայտ է բոլորի համար»,-ասաց նա։
Արման Մխիթարյանը նշեց, որ իրենց նպատակն է հանրությանը խնդրին մասնակից դարձնել և ևս մեկ անգամ հիշեցնել այս ամենի մասին։
«Մեր այս ակցիաները դրա վառ ապացույցն են, որ իրազեկման խնդիր կա, նույնիսկ քաղաքացիներ կան, որ գալիս ու զարմանում են, որ 2021թ.-ից հետո Ադրբեջանում դեռևս հայ ռազմագերիներ կան։ Եվ երբ հասարակությունը տեսնի, և այս հարցը դառնա օրակարգային հարց, կարծում եմ, ուզած-չուզած այդքան բանակցում են, այս հարցն էլ կներառեն բանակցություններում»,-ասաց նա։
Շարժման անդամ Մխիթարյանը հիշեցրեց, որ նոյեմբերի 9-ի պայմանագրով առանց նախապայման բոլորը բոլորի դիմաց գերիները պետք է ազատ արձակվեին, անգամ այն քարտեզների դիմաց, որ պետք է տային, դա էլ անթույլատրելի էր։
«Կարծում եմ՝ գերիների հարցով ևս բանակցություն կլինի, բայց ցանկացած բանակցությունից առաջ պետք է հստակեցնեն՝ դու կատարե՞լ ես պայմանավորվածության այս-այս մասերը, բոլորը բոլորի դիմաց գերիներին ազա՞տ ես արձակել, թե՞ ոչ։ Իրենց հետ բանակցությունները պետք է սկսեն հենց այդ կետից և ոչ թե նոր նախապայմաններ առաջ տանեն»,-ասաց նա։
