Այս պահին ԱԺ-ում մեկնարկել է նախորդ տարվա բյուջեի կատարողականի քննարկումը։ Ինչպես հայտնում է Irakanum.am-ը խորհրդարանում է վարչապետ Նիկոլ Փաշինյանն ու գործադիրի անդամները։ Այս հանգամանքով պայմանավորված Ազգային Ժողովում ուժեղացված ծառայություն է։
Մեծաթիվ անվտանգության աշխատակիցներ են եւ դրսում եւ ներսում։ Լրագրողներին արգելվեց մտնել այն դահլիճ, որտեղ ընթանում է նիստը։ ԱԺ անվտանգության աշխատակիցները պատճառաբանում են, որ աշխատակազմն է նման որոշում կայացրել։
ԱԺ աշխատակազմի ղեկավար Դավիթ Առաքելյանն էլ չկա, անգամ չի բարեհաճել ներկայանալ։ Սակայն առավել քան ակնհայտ է, որ այս ամենը պայմանավորված է այն հանգամանքով, որ ԱԺ-ում է Նիկոլ Փաշինյանը: «Ժողովրդավարության բաստիոնում» լրագրողների աշխատանքի խոչընդոտելը նորանոր «վերելքներ» է ապրում։
