Ալիևը մեկնել է Իրան՝ Արաքս գետի ամբարտակի բացման արարողությանը. բանակցություններ են տեղի ունեցել Ռաիսիի հետ

Իրանի և Ադրբեջանի նախագահներ Էբրահիմ Ռաիսին և Իլհամ Ալիևը կիրակի առավոտյան հանդիպել և բանակցություններ են անցկացրել Իրանում՝ Գըզ Քալասի ամբարտակի բացման արարողությունից առաջ, հայտնում է Mehr-ը։

Իրանի և Ադրբեջանի նախագահներն այցելել են նաև Գըզ-Քալասի ամբարտակի տարբեր տեղամասեր և ծանոթացել շինարարության մանրամասներին և դրա շահագործման առավելություններին:

Էբրահիմ Ռաիսին կիրակի առավոտյան ժամանել է Թավրիզի միջազգային օդանավակայան՝ Արևելյան Ադրբեջանի նահանգ մեկօրյա այց կատարելու և Գըզ Քալասի ամբարտակի բացման արարողությանը մասնակցելու համար:

Ալիևը նույմպես կմասնակցի ամբարտակի բացման արարողությանը։

Գըզ Քալասի ամբարտակը, որը գտնվում է Թավրիզից 220 կմ հյուսիսարևելք, կառուցվել է Արաքս գետի վրա՝ Իրանի և Ադրբեջանի սահմանին։