Ես Արցախը չեմ հանձնել, ես 2018 թվականից արել եմ ամեն ինչ, որ Պաշտպանության բանակը պատրաստ լինի պատերազմի։ Այս մասին մայիսի 5-ին, Չեխիայի Հանրապետության հայ համայնքի հետ հանդիպմանը հայտարարեց վարչապետ Նիկոլ Փաշինյանը՝ ի պատասխան հարցին, թե հողերը զիջելու պարագայում ինչու իր պաշտոնը չի թողնում առավել խելացի մարդկանց։
«Մենք 1994 թվականին հաղթել ենք, դրանից հետո Հայաստանի եւ Ղարաբաղի բնակչության թիվը նվազել է, Ադրբեջանինը՝ կրկնապատկվել։ Դուք ասում եք՝ Արցախը հանձեցիք, շատ լավ։ Դուք նկատի ունեք նոյեմբերի 9-ի համաձայնագի՞րը, թե՞ որ ես մինչ դա ինչ-որ բան չեմ արել։ Բանակցային ողջ ընթացքում հողերի զիջումը եղել է առանցքային խնդիր։ Եթե ձեզ մեկը կասի, որ ինքը հող չէր զիջելու, կստի։ Ես նոյեմբերի 9-ի հայտարարությունը ստորագրել եմ՝ հասկանալով, որ հակառակ պարագայում 30 հազար զինվոր գերի է մնալու։ Ասում եք՝ հողերը հանձնել եք, 30 տարի քանի՞ մարդ էր ապրում այդ հողի վրա։ Ի՞նչ ավելացված հարկ էր ստեղծվում մեր զինվորի համար այդ հողերի վրա։ Համարյա ոչինչ»,- ասաց Փաշինյանը։ Փաշինյանին բավական վրդովեցրեց համայնքի ներկայացուցչի հարցը։ Նա Չեխիայի բնակչին ասաց, որ հայրենիքն այն է, որտեղ ապրում ես։
«Իսկ դուք ինչո՞ւ եք Չեխիայում ապրում։Մեր խնդիրն այն է, որ մենք մի տեղում ապրել ենք, ուրիշ տեղ հայրենիք ենք համարել։ Պետության մեջ պետք է աշխատել եւ հարկեր վճարել։ Հայրենիքը հեռվից սիրելու սովորությանը եկեք վերջ տանք։ Հողը դուք եք հանձնել, որ հաղթանակած հողը թողել եք, եկել եք երջանիկ կյանքով ապրում եք Պրագայում»,- ընդգծեց Փաշինյանը։
Շուշիի քաղաքապետ Արծվիկ Սարգսյանը, «Հրապարակի» հետ զրույցում անդրադառնալով Նիկոլ Փաշինյանի վերոնշյալ հայտարարություններին, ասաց. «Այ տղա, Շուշիում քանի՞ հայ էր ապրում, բա ինչի՞ հանձնեցիր Շուշին: Մեր կողմից ազատագրված բոլոր տարածքներում էլ հայեր են ապրել: Քարվաճառն Արցախի ամենածաղկուն շրջանն էր: Քաշաթաղի շրջանում ապրում էին հայեր, Աղդամում ապրում էին հայեր, Ֆիզուլիում ապրում էին հայեր, ի՞նչ է խոսում Նիկոլ Փաշինյանը, ինչի՞ համար: Շուշիում ինչքա՞ն հայ էր ապրում, Շուշին էլ է հանձնված, էդ որտե՞ղ հայ չէր ապրում: Երևանից էլ բազմաթիվ արտագաղթածներ կան, Երևանը ե՞րբ ես հանձնելու:
Ավելին՝ սկզբղնաղբյուրում
