Գինեսի ռեկորդ սահմանած աշխարհի ամենավաղածին երկվորյակները նշել են առաջին տարեդարձը (լուսանկարներ)

Աշխարհի ամենավաղածին երկվորյակները, որոնք լույս աշխարհ են եկել Տորոնտոյում, նշել են իրենց առաջին տարեդարձը. փոքրիկները լույս աշխարհ են եկել նախատեսված ժամկետից 126 օր շուտ, ինչը բժիշկներին ստիպել է ասել, որ երեխաներին չի հաջողվի փրկել:

Ինչպես գրում է Daily Mail-ը, Ադիան և Ադրիալը ծնվել են ընդամենը 22 շաբաթականում. նրանք կշռում էին կես կիլոգրամ:

Երկվորյակների մայրն ու հայրը՝ Շակինա Ռաջենդրամը և Քևին Նադարաջան, աղոթել են հրաշքի համար այն բանից հետո, երբ կինը վաղաժամ է ծննդաբերել: Նրանք միանգամայն շոկի են մատնվել, երբ բժիշկները նրանց ասել են, որ երկվորյակների ողջ մնալու հույս չկա:

Ինչպես վաղածին երեխաների մեծ մասը, նորածինները որոշ առողջական բարդություններ են ունեցել: Երկվորյակները տարել են ուղեղի արյունահոսություն, աղիների և թոքերի հետ կապված խնդիրներ, եղել են նաև գրեթե մահամերձ պահեր։

«Մենք շատ դժվար խոսակցություններ ենք ունեցել բժիշկների հետ… Բժիշկները գալիս էին մեզ մոտ և ասում. «Գուցե ժամանակն է հրաժարվել բժշկական օգնությունից»», - պատմել է երկվորյակների մայրը՝ Շակինան:

Սակայն ծնողները չեն համաձայնել հրաժարվել իրենց երկվորյակներից:

Արդյունքում Ադիան և Ադրիալը ներկայում  գրանցված են Գինեսի համաշխարհային ռեկորդների գրքում՝ որպես աշխարհի  ամենավաղածին և ամենաթեթև քաշով երկվորյակները: