Թուրքիայի նախագահ Ռեջեփ Թայիփ Էրդողանն ուրբաթ օրը այցելել է օկուպացված Կովսականի ճանապարհին ավտովթարի հետևանքով ստացած վնասվածքներից բուժվող Թուրքիայի նախկին վարչապետ Բինալի Յըլդըրըմին:
Թուրքիայի իշխող ուժի փոխնախագահ Բինալի Յըլդըրըմը և նրա թիկնապահը, ինչպես նաև «Արդարություն և զարգացում» կուսակցության պատգամավոր Շամիլ Այրըմը ճանապարհատրանսպորտային վթարի են ենթարկվել հինգշաբթի՝ Կովսականի ճանապարհին։ 44-օրյա պատերազմի ընթացքում Բաքվի վերահսկողության տակ անցած այդ տարածքում թուրք ազդեցիկ գործիչը Էրդողանի գլխավորած պաշտոնական պատվիրակության կազմում էր։ Վթարի մանրամասները և պատճառը չեն հաղորդվում։ Cumhuriet թերթի տեղեկություններով՝ Յըլդըրըմին տեղափոխող մեքենան «Ջաբրայիլից վերադարձի ճանապարհին չի կարողացել շրջվել և վթարի է ենթարկվել»։
