Ռումբի մասին ահազանգի հետևանքով՝ Երևանի մետրոպոլիտենի բոլոր կայարանները փակվել են, իսկ ուղևորները՝ տարհանվել:
168.am-ը եղավ մետրոպոլիտենի «Հանրապետության հրապարակ» կայարանում՝ տեղում պարզելու, թե ինչ է կատարվում այնտեղ։
Կայարանի մուտքի մատույցներում ԱԻՆ-ի և շտապօգնության մեքենաներ էին կայանել, մեր նկարահանման պահին ժամանեցին նաև կինոլոգներ, որպեսզի շների օգնությամբ հայտնաբերեն ենթադրյալ ռումբը։
168.am-ին հաջողվեց զրուցել ուղևորներից մի կնոջ հետ, որն այդ պահին ներսում է եղել․
«Վագոնի մեջ էինք, բոլորիս հանել են դուրս ու առանց զգուշացնելու, թե ինչ է եղել, որ մենք տեղեկանանք, սթրես չստանալով՝ հանգիստ դուրս գանք։ Ես դեպի 3-րդ մաս էի գնում․․․
Ուղղակի ժողովուրդը շատ արագ վազում էր դեպի աստիճանները։ Ճիշտ է, տեղեկացված չէինք, բայց հասկացանք, որ վտանգ է սպառնում մեզ․․․»։
Մեր նկարահանման պահին մետրոյի կայարանը շարունակում էր փակ մնալ, ԱԻՆ-ի աշխատակիցները ներսում աշխատանքներ էին իրականացնում։
Ավելի վաղ հայտնել էինք, որ այսօր՝ հուլիսի 20-ին, ժամը 12։57-ին Ճգնաժամային կառավարման ազգային կենտրոն ահազանգ է ստացվել, որ Երևանի մետրոպոլիտենի կայարաններում պայթուցիկ սարքեր են տեղադրված։
Նարեկ Խաչատրյան
168.am-ի տեսանյութը՝ առաջիկայում
