Երեկ AntiFake.am կայքում հրապարակվել էր ֆեյսբուքյան օգտատեր Հրանտ Խալաթյանի հումորային գրառումը՝ «Շեֆ էն մի ցուցարարին կերամ, հմի ում ուտեմ», որին կից հեղինակը ձեռքերը ներկի մեջ թաթախված ոստիկանի լուսանկար էր հրապարակել:
AntiFake.am-ում վերը նշված գրառման հրապարակումից հետո խմբագրությունը սպառնալիքներով լի նամակ է ստացել «Արշո Վանեսյան» օգտատիրոջից, որը, դատելով նրա ֆեյսբուքյան էջում հրապարակված լուսանկարներից, ոստիկան է: Օգտատերը ներկայացել է որպես լուսանկարում պատկերված ոստիկանի եղբայր:
Հայհոյանքերով և ակնհայտ սպառնալիքներով լի նամակից առաջ խմբագրությունը նմանատիպ նամակ էր ստացել նաև «Էկո Ար էկո տոպրակներ» անվամբ կեղծ օգտահաշվից:
Հրապարակման մեկնաբանություններում սպառնալիքներ է հնչեցրել նաև «Նազիկ Վանեսյան» անվամբ օգտատերը, որը հավանաբար ոստիկանի ազգականն է:
Ոստիկանական համակարգում կան այսպիսի ծառայողներ, որոնք սպառնում են լրատվամիջոցին: Ոստիկանի ուսադիրը և պատիվը ոտնատակ տվող այս անձը պետք է հասկանա, որ որևէ մեկը, առավել ևս ոստիկանության ծառայողը իրավունք չունի սպառնալ և վիրավորել լրատվամիջոցին և խոչընդոտել լրատվամիջոցի աշխատանքը:
Կոչ ենք անում մեր գործընկերներին՝ լրագրողական համայնքի ներկայացուցիչներին իրենց բողոքի ձայնը բարձրացնել նման արատավոր երևույթների դեմ: Հայաստանում ազատ մամուլը չի ընկրկելու տարատեսակ ճնշումների փորձերի և ռեպրեսիվ գործիքակազմի կիրառման առաջ:
Սույն հրապարակումը AntiFake.am-ը ներկայացնում է որպես հաղորդում հանցագործության մասին: Հորդորում ենք ոստիկանությանը հետևողական լինել սույն ոստիկանին պատասխանատվության ենթարկելու գործընթացում:
Antifake.am-ի խմբագրություն
