ԲՀԿ առաջնորդ Գագիկ Ծառուկյանի մասին դիտարկվել են ավելի շատ դրական, քան բացասական հոդածներ։ Այս մասին հայտնում են «Մեդիա պաշտպան»-ի ֆեյսբուքյան էջում:
«2020թ-ի մայիսի 21-ից 31-ը «Մեդիա պաշտպան» նախաձեռնությունը հետևել է առցանց մամուլում ԱԺ պատգամավոր Գագիկ Ծառուկյանի անձին ու գործունեությանն առնչվող նյութերին։ Մշտադիտարկվել է ներհայաստանյան 35 առաջատար լրատվական կայք։
Նշված ժամանակահատվածում դիտարկվել է 135 հոդված, որոնցից 6-ը եղել է բացասական, 36-ը՝ դրական, 93-ը՝ չեզոք։
ԲՀԿ առաջնորդ Գագիկ Ծառուկյանի մասին դիտարկվել են ավելի շատ դրական, քան բացասական հոդածներ։ Ըստ մամուլի հրապարակումների` գործարար Լևոն Մարկոսը խնդիրներ ունի Գագիկ Ծառուկյանի հետ ․«Կրեդիտ Երևան» բանկ ԲԲ ընկերության և «Լև Մարսեդ» ՍՊ ընկերության առանձնապես խոշոր չափերի արժեք ունեցող բաժնետոմսերը առերևույթ խարդախությամբ հափշտակելու դեպքի առթիվ քրգործ է հարուցվել, սակայն որևէ մեկին մեղադրանք չի առաջադրվել, թեև վերջինս ճանաչվել է տուժող և քաղաքացիական հայցվոր։ Լևոն Մարկոսի պահանջն ուղղված է նաև դատարանի 2002 թ. վճռի և պետական մարմինների հակաօրինական գործողությունների հետևանքով հարկադիր վաճառված «Երևանի հաստոցաշինական արտադրական միավորում» ընկերության բաժնետոմսերի, Երևանի երեք շուկաների (Մասիվի, Գումի, Պրոսպեկտի) և մյուս գույքերի աճուրդներին մասնակցած կամ այլ անօրինական մեխանիզմներով այսօր դրանց սեփականատերերը հանդիսացող անձանց, այդ թվում՝ Գագիկ Ծառուկյանի, Գագիկ Բեգլարյանի և Սամվել Ալեքսանյանի դեմ»:
Մամուլում նշվում է, որ Գագիկ Ծառուկյանի գործողությունների հետևանքով մի շարք քաղաքացիներ խնդիրներ են ունեցել սեփական բնակարանները ձեռք բերելու հարցում․ «Խնդիրը Ամիրյան 4/4 հասցեի բնակիչների դեպքում է։ Նրանք էլ զոհ էին դարձել մեկ այլ օլիգարխիկ խմբի՝ Հովիկ Աբրահամյանի, Գագիկ Ծառուկյանի և տրանսպորտի նախկին նախարար Անդրանիկ Մանուկյան խմբին։ Այս խմբի կողմից «քցված» քաղաքացիները 16 տարվա պայքարից հետո այլևս հույս չունեն, որ հնարավոր է արդարադատություն լինի ու իրենց բնակարանները ի վերջո դառնան իրենց սեփականությունը։ Այդ իսկ պատճառով նրանք որոշել են չնչին գնով վաճառել Ամիրյան 4/4 հասցեում գտնվող իրենց բնակարանների տարածքը և հրաժարվել հետագա պայքարից»։
Մամուլում նշվում է, որ «Բարգավաճ Հայաստան» կուսակցության և «Մուլտի գրուպ կոնցեռնի» հիմնադիր Գագիկ Ծառուկյանի նախաձեռնությամբ իրականացվող գործունեությունը մշտապես ուղղված է եղել տեղի ու ժամանակի պահանջը մեղմելուն: Այս ամենը նկատում ու գանահտում են բազմահազար բնակիչներ:
Մամուլի մեկ այլ հրապարակման համաձայն` Գագիկ Ծառուկյանը կորոնավիրուսի դեմ պայքարի մեթոդիկան առաջարկել է, բայց իշխանությունները հետևողական չեն եղել․ «Երբ մարտի 4-ին ԲՀԿ առաջնորդ Գագիկ Ծառուկյանը հրապարակավ կոչ արեց կարանտին սահմանել արտերկրից ժամանող մեր հայրենակիցների համար, իշխանության առաջին դեմքերը հանցավոր անտարբերությամբ շարունակում էին կորոնավիրուսը լուրջ հիվանդություն չհամարել ու մարզերում լծված էին «Այո»-ի քարոզչությանը»։
Մամուլում նշվում է նաև, որ Գագիկ Ծառուկյանը շարունակում է իր ծրագրերը և հավելում են, որ որքան էլ «Բարգավաճ Հայաստան» կուսակցության և «Մուլտի գրուպ կոնցեռնի» հիմնադիր Գագիկ Ծառուկյանին ներքաղաքական խառը իրադարձությունների մեջ ներքաշելու փորձեր արվեն, միևնույն է, չի ստացվի: Նա իր կեցվածքով բազմիցս է ապացուցել, որ գործի մարդ է, ինչ անում է երկրի բարօրության ու բարգավաճման համար է անում, իսկ ներքաղաքական խժդժությունները միայն խանգարում են գործին»:
