ՀՀ վարչապետ Նիկոլ Փաշինյանը ֆեյսբուքյան ուղիղ եթերում անդրադարձել է ամանորյա պետական ծախսերին: Նա նշել է, որ հարցը շատ կարեւոր հայեցակարգային նշանակություն ունի:
«Հիշում եք, որ նոր տարուց առաջ կառավարությունը որոշում կայացրեց 271 միլիոն դրամ հատկացնել Երեւանի քաղաքապետարանին, որպեսզի Հանրապետության հրապարակի ամանորյա միջոցառումները կազմակերպվեն նոր տրամաբանությամբ եւ նոր թափով, և ընդհանուր առմամբ այսս մասով կառավարությունը նոր քաղաքականություն է որդեգրել: Երբ որ այդ գումարը տրամադրվում էր, շատ քննադատություններ հնչեցին, թե ինչքանով է դա նպատակահարմար, ինչքանով է էֆեկտիվ այդպիսի գումարներ հատկացնել»:
Վարչապետը նշեց, որ այսօր այդ հարցին կանդրադառնա՝ արդյունքների վրա հիմնվելով:
Փաշինյանի խոսքերով՝ նման խոշոր գումար հատկացնելով նպատակ են ունեցել զբոսաշրջային հոսք ապահովել, որպեսզի քաղաքացիների համար մայրաքաղաքում Նոր տարին նշելն ավելի գրավիչ լիներ:
«Դեկտեմբերի 28-ից հունվարի 6-ն ընկած ժամանակահատվածում նախորդ տարվա նույն ժամանակահատվածի համեմատ մենք ունեցել ենք 9 միլիարդ 307 միլիոն դրամի հավելյալ դրամաշրջանառություն»:
Վարչապետը պարզաբանեց, որ 9 միլիարդից 4 միլիարդ դրամի շրջանառություն տեղի է ունեցել ՀՀ մարզերում:
Նիկոլ Փաշինյանին հավաստիացրել են, որ 9 միլիարդ դրամից գեներացվելու է շուրջ 325 միլիոն դրամի հարկ:
«Այսինքն, այն գումարը, որ մենք դեկտեմբերին ծախսեցինք, այդ գումարն առնվազն կրկին վերադառնալու է պետական բյուջե եւ մի բան էլ ավելի»,- ասել է վարչապետը:
Հաջորդ տարի ավելի մասշտաբային են լինելու ծախսերը՝ Ամանորի հետ կապված, որպեսզի ավելի շատ հարկեր գեներացվեն, ընդգծել է Փաշինյանը: