Հրշեջ-փրկարարները ջանում են իրագործել անհնարինը. ԱԻՆ պարզաբանումը

Հրշեջ-փրկարարները ջանում են իրագործել անհնարինը. ԱԻՆ պարզաբանումը
Սեպտեմբեր 10 17:47 2019

ՀՀ արտակարգ իրավիճակների նախարարությունը արձագանքել է ԶԼՄ-ներում վերջին շրջանում շրջանառվող տեղեկությունների վերաբերյալ, թե հրշեջ-փրկարարները դեպքի վայր ուշ են հասնում, պատշաճ չեն աշխատում, հրդեհշիջման ժամանակ օպերատիվություն չեն ցուցաբերում:  

 

 

«Արմենպրես»-ը ներկայացնում է ՀՀ արտակարգ իրավիճակների նախարարության տարածած պարզաբանումը. 

 

«Վերջին շրջանում ԶԼՄ-ներում շրջանառվում են տեղեկություններ հրշեջ-փրկարարների՝ դեպքի վայր ուշ հասնելու, պատշաճ չաշխատելու, հրդեհշիջման ժամանակ օպերատիվություն չցուցաբերելու վերաբերյալ:

 

Տեսակետ է հնչել, որ հուլիսի 6-ին՝ Երևան-Մեղրի ավտոճանապարհի 54-րդ կմ հատվածում, Զոդի կամրջի վրա տեղի ունեցած ողբերգական դեպքի ժամանակ ԱԻՆ-ը մոտ մեկ ժամ համարյա բան չի արել:

 

Թյուրիմացությունից խուսափելու համար նշենք, որ մայրաքաղաքի խցանումների և ԱԻՆ ունեցած տեխնիկայի պայմաններում հրշեջ-փրկարարները ջանում են իրագործել նույնիսկ անհնարինը: Զոդի դժբախտ պատահարի հետ կապված տեղեկացնում ենք որ, ԱԻՆ Ճգնաժամային կառավարման ազգային կենտրոնում ահազանգը ստացվել է 15:12-ին, որից 4 րոպե անց հրշեջ-փրկարարական մեկ մարտական հաշվարկ ժամանել է դեպքի վայր, ևս 9 րոպե անց հասել է երկրորդ մեքենան: Հրդեհը մեկուսացվել է 15:35-ին, մարվել՝ 15:45-ին:  Հրշեջ-փրկարարները գործել են բացառիկ օպերատիվությամբ՝ իրականացնելով իրենց գործառնական պարտականությունները: Ցավոք, այդուհանդերձ, հնարավոր չեղավ խուսափել զոհերից:

 

Չմտնելով այլ պատկան մարմինների իրավասության և պարտականության տիրույթ՝ նշենք, որ վարորդների բուժսպասարկման, մեքենաների շահագործման, տեխնիկական հսկողության, գազաբալոնների տեղակայման և փորձարկման, օգտագործվող վառելանյութի տեսակի հետ կապված հարցերը դուրս են ԱԻՆ գործառույթներից:

 

Միաժամանակ տեղեկացնում ենք, որ նախարարի հանձնարարությամբ, յուրաքանչյուր, հատկապես հասարակական հնչողություն ունեցող արտակարգ դեպք մանրակրկիտ վերլուծվում է, պարզաբանվում են մանրամասները՝ հետագայում նման և այլ դեպքեր կանխարգելելու նպատակով:  Անվանական պատասխանատվություն է սահմանվում  թերացողների նկատմամբ և նույն կերպ խրախուսվում են աշխատանքը պատշաճ կատարած աշխատակիցները»: 

loading...