Հանուն սիրելի տղամարդու շատ բան կարելի է անել, բայց որոշ քայլեր կան, որոնք անելուց հետո Ձեզ այլևս նախկինի պես չեք զգա և լիարժեք կյանքով չեք ապրի:
Հրաժարվել երազանքներից
Հրաժարվել սեփական երազանքներից նույնն է` ինչ հրաժարվել ինքդ քեզանից: Սա, իհարկե, չի վերաբերվում այն լեդիներին, որոնք որոշել են իրենց բացարձակ նվիրել երեխաների դաստիարակությանն ու ընտանիքին` մոռանալով կարիերայի մասին: Սակայն, եթե տղամարդն ինքն է ստիպում` հրաժարվեք Ձեր երազանքներից` պատճառաբանելով, որ դա անելու եք հանուն երեխաների և ընտանիքի, ապա մտածեք` Ձեզ պե՞տք է նման եսասեր տղամարդ:
Հրաժեշտ տալ բարոյական սկզբունքներին
Յուրաքանչյուր մարդ ունի իր բարոյական սկզբունքները, հետևապես զույգերը պետք է հարգանքով վերաբերեն միմյանց արժեքային համակարգին: Եթե չլինի այդ հարգանքը, ապա ամենակատարյալ թվացող հարաբերությունն էլ կքայքայվի:
Փոխել արտաքինը
Կանայք սիրում են փոփոխություն, սակայն այդ փոփոխությունները նախ պետք է մեր ներսում ծնվեն: Ամսագրերում ինչ-որ կոսմետիկ գործընթացների մասին կարդալով` մենք նախ ընկալում ենք այդ տեղեկատվությունը, հետո մտածում արժե՞ կիրառել, թե՞ ոչ: Տղամարդիկ այս իրավիճակներում կարող են մեզ համար ներշնչանքի աղբյուր լինել, բայց երբեք չթելադրել իրենց ցանկությունները: Իսկ եթե նրանք ինչ-որ պահանջներ են ներկայացնում, ապա ավելի լավ է հեռանալ այդ բռնակալից:
Չշփվել ընկերների հետ
Ընկերների հետ շփումները տարբեր աստիճանի են լինում: Երբեմն ընկերական հավաքները լինում են հաճախակի և երկար, ինչը չի կարող չնյարդայնացնել Ձեր կեսին: Բայց, եթե Ձեր ընտրյալը փորձում է Ձեր կյանքից ընդհանրապես դուրս մղել ընկերներին կամ ընկերուհիներին, ապա քիչ է հավանականությունը, որ ապագայում նրա հետ ներդաշնակ հարաբերություններ կունենաք:
Քաղցած մնալ
Կանայք այդպիսին են ստեղծված` ամեն օր ճանապարհ են փնտրում դեպի կատարելություն: Սննդակարգերին հետևելը կատարյալ գեղեցկության հասնելու տարբերակներից մեկն է: Բայց ինչպես հայտնի է, գեղեցկության մասին ընկալումները տարբեր են: Եթե Ձեր մարմնում Ձեզ լավ ու հարմարավետ եք զգում, իսկ Ձեր տղամարդը այլ կարծիքի է, ապա Դուք նույն ճանապարհով չպետք է ընթանաք:
Թույլ տալ` Ձեզ վերահսկեն
Ձեր կյանքի ու Ձեր որոշումների համար պատասխանատու եք Դուք: Յուրաքանչյուր ոք իրավունք ունի ազատության և սեփական կարծիքն ունենալու: Իհարկե, եթե Դուք զույգ եք, ապա պետք է միմյանց որոշումների մասին տեղյակ լինեք, բայց երբեք թույլ չտաք, որ տղամարդը Ձեզ վերահսկի:
Չմոռանաք Ձեր հետաքրքրությունների մասին
Երբեք չկորցնեք Ձեր անհատականությունը: Մարդու մասին պատկերացում են կազմում` ելնելով իր հետաքրքրությունների շրջանակից: Մի հրաժարվեք Ձեր հետաքրքրություններից, չէ՞ որ հենց դրա համար են Ձեզ սիրել ու ընտրել:
