Կոտայքի մարզի Քանաքեռավան գյուղի բնակիչ Մուրադ Օզմանյանն առավոտյան ոչխաների մի մասը վնասված ու հոշոտված է գտել, հաղորդում է Shamshyan.com-ը:
Գյուղացին ոչխարները ոչ թե անասնագոմում է պահում, այլ տնից բավական հեռու ցանցով առանձնացված տարածքում: Երբ է դեպքը տեղի ունեցել, չի կարող ասել, ականատեսներ նույնպես չկան: Չգիտի նաեւ, վայրի շները, թե գայլներն են հոշոտել ոչխաներին: Ընդհանուր առմամբ, 130 ոչխար ունի, 5-ը վնասված են, 15-ը հոշոտված:
Տուժած բնակիչը նշել է, որ վերջին երեք տարում այս գյուղում նման դեպք չէր եղել. «Երեք տարի առաջ են գայլերը ոչխար հոշոտել այն էլ ոչ թե գյուղում, այլ սարի տակին: Ընտանիքի ապրուստի միակ միջոցը անասնապահությունն է: Հինգ անչափահաս երեխաներին դրանով եմ պահում»,-ասել է նա՝ հավելելով, որ անասուններին գրավադրված ոսկու դիմաց ստացած գումարով էր գնել:
Դեպքի մասին նա տեղեկացրել է Քանաքեռավանի գյուղապետին: Գյուղապետարանում կարծում են՝ վայրի շներն են ոչխարներին հոշոտել, իսկ դրանց ոչնչացնելու իրավունք իրենք չունեն: Բնակիչները պատասխանատուների ուշադրությունն են հրավիրում խնդրի վրա, խնդրում են, հարցը լուծել, որ նման դեպքեր այլեւս չկրկնվեն:
