Արցախի Հանրապետության մայրաքաղաք Ստեփանակերտում, Համահայկական 7-րդ ամառային խաղերի շրջանակում, Գեղարքունիքի մարզը ներկայացնող բազկամարտիկները երեք ոսկե մեդալ են նվաճել:
Ինչպես «Արմենպրես»-ին տեղեկացրեց Գեղարքունիքի մարզպետարանի ԿՄՍ վարչության մշակույթի եւ սպորտի բաժնի վարիչ Գեղամ Չարվադարյանը, Գեղարքունիքի մարզը ներկայացնող մարզիկները բազկամարտի մրցումներում գրանցել են լավ արդյունք՝ նվաճելով 3 ոսկե, 4 արծաթե եւ 1 բրոնզե մեդալներ: «Բազկամարտ մարզաձևում վերին գետաշենցի Ազատ Սրապյանը ձախ ձեռքով նվաճել է արծաթե, աջ ձեռքով՝ ոսկե մեդալ: Վարդենիսցի Վարդան Խաչատրյանը ձախ ձեռքով նվաճել է արծաթե, աջ ձեռքով՝ ոսկե մեդալ: Զոլաքարցի Ջանիբեկ Ղազարյանը ձախ ձեռքով նվաճել է արծաթե, աջ ձեռքով՝ ոսկե մեդալ: Բազկամարտի կանանց պայքարում վերին գետաշենցի Էսմիրա Բեյբությանը ձախ ձեռքով նվաճել է բրոնզե, իսկ աջ ձեռքով արծաթե մեդալ: Փաստորեն, նախորդ օրը հաջողության հասած մարզիկները կրկնեցին նվաճումները շատ ավելի փառահեղ ձեւով»,- տեղեկացրեց Գեղամ Չարվադարյանը:
Խոսրով Խլղաթյան
