Հայաստանի չեմպիոն «Արարատ-Արմենիա»-ն Եվրոպա լիգայի որակավորման 3-րդ փուլի շրջանակներում տանը ցավալի պարտություն կրեց Վրաստանի չեմպիոն «Սաբուրթալո»-ի դեմ խաղում: «Արմենպրես»-ի փոխանցմամբ՝ առաջին խաղակեսում 1:0 հաշվով հաղթելուց հետո հայկական թիմը երկրորդ խաղակեսում չկարողացավ անառիկ պահել սեփական դարպասը և պարտվեց 1:2 հաշվով:
Խաղի 31-րդ րոպեին «Արարատ-Արմենիա»-ն բացեց խաղի հաշիվը: Մաիլսոն Լիմայի փոխանցումից հետո գոլի հեղինակ դարձավ Անտոն Կոբյալկոն: Երկրորդ խաղակեսում՝ 72-րդ րոպեին հյուրերի կազմում խաղի հաշիվը հավասարեցրեց Սանդրո Ալթունաշվիլին, իսկ 76-րդ րոպեին Լևան Կենյան անհատական անցումից հետո առաջ մղեց վրացական թիմին:
Հայաստանի չեմպիոնը պատասխան խաղն անցկացնելու համար Վրաստան կմեկնի պարտվածի կարգավիճակով, սակայն դեռ ոչինչ ավարտված չէ: Ամեն ինչ կորոշվի օգոստոսի 14-ին՝ «Սաբուրթալո»-«Արարատ-Արմենիա» պատասխան հանդիպմանը:
«Արարատ-Արմենիա»-ն «Սաբուրթալո»-ի արգելքը հաղթահարելու պարագայում ԵԼ փլեյ-օֆֆ փուլում կմրցի «Դյուդելանժ»-«Նոմե Կալյու» զույգի հաղթողի հետ:
