Կառավարության հուլիսի 11-ի նիստը բավականին թեժ էր: Այն իր ակտիվությամբ թեժացրեց առողջապահության նախարար Արսեն Թորոսյանը: Նախարարը նիստի սկզբին հայտարարեց, որ ցանկանում է կառավարության օրակարգ ընդգրկված առաջին եւ երկրորդ հարցերը դառնան զեկուցվող: Նշյալ երկու նախագծերով նախատեսվում էր կառավարության ենթակա վեց տեսչական մարմիններին ծառայողական ավտոմեքենաներ տալ, որոնք սպասարկելու էին տեսչական մարմինների ղեկավարներին եւ տեսչական մարմինների վարչության պետերին: Խոսքը 91 ավտոմեքենայի մասին էր: Արդյունքում ստացվում էր, որ տեսչական մարմնի յուրաքանչյուր վարչության պետ ունենալու էր ծառայողական ավտոմեքենա:
Արսեն Թորոսյանի առաջարկությունն ակնհայտ էր, որ նյարդայնացրեց փոխվարչապետ Տիգրան Ավինյանին եւ վարչապետի աշխատակազմի ղեկավար Էդուարդ Աղաջանյանին: Նրանք ամեն կերպ ջանացին, որ նախագիծն ընդունվի որպես չզեկուցվող, սակայն Նիկոլ Փաշինյանն ականջալուր եղավ առողջապահության նախարարին:
Արդյունքում կանխվեց, որ ծառայողական ավտոմեքենաների ընդհանուր քանակը Հայաստանի Հանրապետությունում աճի է 73-ով եւ հասնի 1774-ի: Սակայն սրա համար բավականին լարված քննարկում տեղի ունեցավ: Ուշագրավ էր նաեւ այն հանգամանքը, որ այս նախագծից ՀՀ վարչապետ Նիկոլ Փաշինյանը տեղյակ չէր, քանի որ առողջապահության նախարարի դիտարկումների ժամանակ նա ասում էր, որ սա տեխնիկական հարց է, մինչ, ի վերջո հայտնի դարձավ, որ ծառայողական ավտոմեքենաների թիվն է աճում Նոր Հայաստանում:
Ի դեպ, հիշեցնենք, որ ընդդիմադիր տարիներին հենց Նիկոլ Փաշինյանն էր քննադատում ծառայողական ավտոմեքենաների առատությունն ու ասում, որ Հայաստանը պետք է ունենա ընդամենը 35 ծառայողական ավտոմեքենա: Նիկոլ Փաշինյանն այդ տարիներին Հայաստանը համարում էր «պադավատապետություն»:
Արսեն Թորոսյանի այսօրվա պայքարը «պադավատապետության» դեմ առաջին հայացքից տպավորություն էր ստեղծում, որ գործադիր մարմնի ղեկավարը, որը նաեւ իշխող քաղաքական ուժի անդամ է, մտածում է պետական բյուջեի մասին: Գուցե եւ Արսեն Թորոսյանն արդար էր իր մղումներում, իսկապես նրան հետաքրքրում է հանրային միջոցները: Սակայն առանց որեւէ պնդումներ անելու հիշենք մի իրավիճակի մասին:
Նախ նշենք, որ վերոնշյալ նածագծի համաձայն Առողջապահական և աշխատանքի տեսչական մարմնին սպասարկելու համար հատկացվելու էր 10 ծառայողական ավտոմեքենա: Վերջերս կտրուկ լարվել է Առողջապահական և աշխատանքի տեսչական մարմնի ղեկավար Էդգար Խուրշուդյանի եւ առողջապահության նախարար Արսեն Թորոսյանի հարաբերությունները: Խուրշուդյանի կառույցը վերջերս 250 հազար դրամով տուգանել է Առողջապահության նախարարի նախկին խորհրդական Վահե Տեր-Մինասյանին՝ մարդու պապիլոմա վիրուսի դեմ պատվաստանյութի գովազդի համար: Արսեն Թորոսյանն էլ իր հերթին հայտարարել էր, որ դիմելու է վարչապետին՝ կառավարությանը ենթակա Առողջապահական և աշխատանքի տեսչական մարմնի ղեկավարի պաշտոնավարման հարցը վերանայելու համար:
Այժմ բարդ է ասել՝ Արսեն Թորոսյանի պայքարը ինչ-որ ենթատեքստ ուներ, թե՝ ոչ, որն ուղղված էր Առողջապահական և աշխատանքի տեսչական մարմնի ղեկավար Էդգար Խուրշուդյանի: Սակայն, փաստենք, որ նրա վճառականությունն այս անգամ հանրօգուտ եղավ, եթե անգամ նրա ցանկությունը նաեւ դա էր:
