Ռուսաստանի Կենտրոնական զինվորական օկրուգում մարտունակության հանկարծակի ստուգում է սկսել: Զորքերը բերվել են մարտական բարձրագույն պատրաստության, հայտարարել է ՌԴ պաշտպանության նախարար Սերգեյ Շոյգուն: Նա ասել է, որ ստուգումները սկսել են նախագահ Պուտինի որոշմամբ: Այս մասին գրում է Lragir.am-ը։
Շոյգուն ասել է, որ այս միջոցառումն ուղղված է Կենտրոնասիական շրջանում անվտանգության ապահովման գնահատականին: Նա ասել է, որ միաժամանակ բարձր մարտական պատրաստության վիճակի է բերվել Հարավային ու Արեւելյան օկրուգների զորքերի մի մասը: Հիշեցնենք, որ Գյումրիի բազան ու Էրեբունի օդանավակայանը Հարավային օկրուգի կազմում են:
Հայաստանի շուրջ՝ Իրանում ու Վրաստանում իրավիճակը սրվում է: Ստամբուլում ընդդիմադիր թեկնածուի հաղթանակը փորձագետները գնահատում են որպես Թուրքիայում հնարավոր տրանսֆորմացիաների դետոնատոր:
Այսօր վարչապետ Նիկոլ Փաշինյանը հրավիրել է Ազգային անվտանգության խորհրդի նիստ, որի ժամանակ քննարկվել է իրավիճակը Հայաստանի շուրջ: Նա ասել է, որ Հայաստանի շուրւ անվտանգային միջավայրը ոչ թե լիցքաթափվել է, այլ հակառակը: Նա ասել է, որ անհրաժեշտ է քննարկել ռիսկերի կառավարման մեխանիզմների հարցը իրավիճակի սրման դեպքում:
Մարտահրավերները կարող են առաջանալ ամենատարբեր հարցերում՝ հաղորդակցությունների շրջափակումից մինչեւ ռուսական զորքերի գործարկում շրջանում, ռազմական գործողությունների պարագային: