ՀՀ Լոռու մարզի դատախազությունում այս տարվա սկզբին ուսումնասիրվել էր 2018 թվականի ընթացքում ՀՀ ԱՆ «Վանաձոր» քրեակատարողական հիմնարկում ապօրինի թմրամիջոցների իրացման, ձեռք բերման եւ առհասարակ դրանց ապօրինի շրջանառության դեմ տարվող պայքարի ու կանխարգելման օրինականության վիճակը: Պարզվել էր, որ նաեւ ՔԿՀ-ի աշխատակիցների կողմից իրենց աշխատանքային պարտականությունները պատշաճ կերպով չկատարելու հետեւանքով էապես նվազել են լատենտային բնույթ կրող այս հանցագործության դեպքերի բացահայտման ցուցանիշները:
Մասնավորապես արձանագրվել է, որ 2018թ. ողջ տարվա ընթացքում ՀՀ ԱՆ «Վանաձոր» ՔԿՀ աշխատակիցների կողմից հայտնաբերվել եւ կանխվել էր թմրամիջոցների ապօրինի շրջանառության ընդամենը 3 դեպք: Մինչդեռ Լոռու մարզի դատախազության հետեւողականության արդյունքում ակնհայտ էր դարձել, որ հիշյալ հիմնարկում եղել են թմրամիջոցների ապօրինի շրջանառության այլ արատավոր դրսեւորումներ: Օրինակ, Լոռու մարզի ընդհանուր իրավասության առաջին ատյանի դատարանում քննվող քրեական գործի հերթական դատական նիստի ընթացքում ամբաստանյալը հայտնել էր, որ ՀՀ ԱՆ «Վանաձոր» ՔԿՀ-ում պատիժ կրելու ընթացքում օգտագործել է «ազալեպտին» եւ «դիազեպամ» տեսակի հոգեմետ նյութեր, որոնք իրեն տրամադրել են քրեակատարողական հիմնարկի դատապարտյալները:
Չնայած մարզի դատախազի կողմից այս կապակցությամբ ներկայացված զեկուցագրի հիման վրա ՔԿՀ-ում նյութերի նախապատրաստման շրջանակներում անձը տված բացատրություններով հերքել էր դատարանում իր կողմից արված հայտարարությունը, սակայն նշանակված դատատոքսիկոքիմիական փորձաքննության եզրակացությամբ հաստատվել էր, որ նրանից վերցված մեզի փորձանմուշում հետազոտությամբ հայտնաբերվել է «ամֆետամին» տեսակի թմարմիջոց: Ընդ որում՝ նույն եզրակացությամբ փաստվել էր, որ տվյալ տեսակի թմարմիջոցն ու դրանց մետաբոլիտները կարող են հայտնաբերվել օրգանիզմ ներմուծումից հետո շուրջ 1-ից մինչեւ 10-ն օրվա ընթացքում: Այսինքն թմրամիջոցը ՔԿՀ է ներթափանցվել, իրացվել եւ օգտագործվել այդ ժամանակահատվածում, ինչը փաստացի դուրս էր մնացել ՔԿՀ համապատասխան ծառայողների տեսադաշտից:
Նշված փաստական տվյալները վկայել են, որ ՀՀ ԱՆ «Վանաձոր» ՔԿՀ-ի, ինչպես նաեւ ՀՀ ոստիկանության Լոռու մարզային վարչության ենթակայության տակ գտնվող բաժինների աշխատակիցների կողմից ապօրինի թմրամիջոցների իրացման դեպքերի նկատմամբ չի իրականացվել պատշաճ վերահսկողություն, չեն ձեռնարկվել գործուն միջոցառումներ դրանք կանխելու ուղղությամբ: Ավելին՝ քրեական գործերի նյութերի ուսումնասիրությամբ պարզվել էր, որ 2018թ. հայտնաբերված երեք դեպքերից երկուսում ապօրինի ձեռք բերված թմրամիջոցի կամ հոգեմետ նյութերի՝ ՔԿՀ ներս անցկացնելու եւ իրացնելու փորձերին անմիջական մասնակցություն են ունեցել ՔԿՀ-ի աշխատակիցները:
Հաշվի առնելով առկա անհանգստացնող վիճակը՝ ՀՀ Լոռու մարզի դատախազ Արսեն Մարտիրոսյանն այս տարվա փետրվարին միջնորդագիր էր ներկայացրել ՀՀ ԱՆ «Վանաձոր» ՔԿՀ պետին եւ ՀՀ ոստիկանության Լոռու մարզային վարչության պետին՝ ձեռնարկելու ակտիվ, համագործակցված եւ գործուն միջոցառումներ՝ ՀՀ ԱՆ «Վանաձոր» ՔԿՀ-ում թմրամիջոցների ապօրինի շրջանառության դեպքերը հայտնաբերելու, դրանք կանխարգելելու ուղղությամբ:
Մարզի դատախազություն ստացված պատասխան գրություններով հավաստիացվել էր, որ միջնորդագրի քննարկման արդյունքում ՔԿՀ-ում ուժեղացվել է հսկողությունը արգելված իրերի, հատկապես թմրամիջոցների ներթափանցման ուղիները, հանգամանքները եւ մեղավորներին հայտնաբերելու ուղղությամբ եւ այդ նպատակով ձեռնարկվում են ակտիվ միջոցառումներ: Բացի այդ՝ Ոստիկանության մարզային վարչության ենթակա բաժիններին եւ ՔԿՀ համապատասխան ծառայողներին հանձնարարվել էր ակտիվացնել թմրամիջոցների իրացման փաստերի հայտնաբերման նպատակով համագործակցությունը, գործուն միջոցներ ձեռնարկել թմրամիջոցների ապօրինի շրջանառության, այդ թվում թմրամիջոցների իրացման վերաբերյալ օպերատիվ-տեղեկություններ ձեռք բերելու եւ իրացնելու ուղղությամբ համակարգված միջոցառումները:
Արդյունքում, ըստ մարզի դատախազությունում իրականացված՝ 2019 թվականին ՀՀ ԱՆ «Վանաձոր» ՔԿՀ-ում թմրամիջոցների ապօրինի շրջանառության դեմ տարվող պայքարի աշխատանքների վիճակի միջանկյալ ուսումնասիրության՝ մարզի դատախազի միջնորդագրի հիման վրա նշված ուղղություններով ակտիվացված աշխատանքների շնորհիվ այս տարվա ընթացքում, հունիսի 10-ի դրությամբ, արդեն իսկ հայտնաբերվել է ՔԿՀ թմրամիջոց անցկացնելու փորձի 5 դեպք, այսինքն 2 դեպքով կամ 60 տոկոսով ավելի, քան ամբողջ 2018թ. ընթացքում: Նշված 5 դեպքերից 4-ով ՀՀ քրեական օրենսգրքի 34-268-րդ, 34-266-րդ եւ 266-րդ հոդվածների տարբեր մասերի հատկանիշներով հարուցվել է 4 քրեական գործ, իսկ մեկ դեպքով քրեական գործ հարուցելը մերժելու մասին որոշում է կայացվել՝ նկատի ունենալով, որ ՔԿՀ այցելած անձի մոտ հայտնաբերված թմրամիջոցը եղել է մանր չափի, ինչի պատճառով վերջինս ենթարկվել է վարչական պատասխանատվության:
Նշված քրեակատարողական հիմնարկ ապօրինի հոգեմետ նյութ անցկացնելու եւ իրացնելու փորձ կատարելու դեպքի առթիվ վերջին քրեական գործը ՀՀ ԱՆ «Վանաձոր» քրեակատարողական հիմնարկի հետաքննիչի կողմից նախապատրաստված նյութերով հարուցվել է հունիսի 7-ին՝ ՀՀ քրեական օրենսգրքի 34-268-րդ հոդվածի 1-ին մասով եւ ՀՀ քրեական օրենսգրքի 34-266-րդ հոդվածի 2-րդ մասի 3-րդ կետի հատկանիշներով: Նյութերի նախապատրաստմամբ պարզվել է, որ Վանաձոր քաղաքի բնակիչն ապօրինի ձեռք է բերած եւ իր տաբատի գրպանում քողարկած՝ «Պրեգաբալին» հոգեմետ նյութ պարունակող «PGN-300» գրառմամբ թվով երկու հատ դեղապատիճը իրացնելու նպատակով փորձել էր անցկացնել ՀՀ ԱՆ «Վանաձոր» քրեակատարողական հիմնարկ՝ փորձելով օգտվելով նույն հիմնարկում պահվող կալանավորված անձին տեսակցելու հնարավորությունից: Սակայն հանցագործությունն ավարտին հասցնել չէր կարողացել, քանի որ վերջինիս անձնական խուզարկությամբ թմրամիջոցը հայտնաբերվել եւ վերցվել էր ՔԿՀ ծառայողների կողմից: Դեպքի առթիվ հարուցված քրեական գործը նախաքննություն իրականացնելու նպատակով ուղարկվել է ՀՀ ՔԿ Լոռու մարզային վարչություն:
