ՀՀ երկրորդ նախագահ Ռոբերտ Քոչարյանը բանտից նոր ուղերձ է հղել (տեսանյութ)

ՀՀ երկրորդ նախագահ Ռոբերտ Քոչարյանը բանտից նոր ուղերձ է հղել (տեսանյութ)
Մայիս 12 22:45 2019

Երեւանում տեղի ունեցավ ՀՀ երկրորդ նախագահ Ռոբերտ Քոչարյանի «Կյանք եւ ազատություն» գրքի հայերեն թարգմանության շնորհանդեսը, որին ներկա էին ընտանիքի անդամները, հարազատները, քաղաքական, մշակութային, հասարակական գործիչներ եւ համախոհներ: Թեպետ հայտնի պատճառներով այս անգամ եւս գրքի շնորհանդեսին ներկա չէր Ռ. Քոչարյանը, բայց որդին՝ ԼԵՎՈՆ ՔՈՉԱՐՅԱՆԸ ընթերցեց հոր ուղերձը ներկաներին:

«Սիրելի՛ բարեկամներ, վերջապես հայտնվեց իմ գրքի հայերեն թարգմանությունը: Ես շատ կցանկանայի, որ գրքի հայերեն եւ ռուսերեն հրատարակությունը լույս տեսնեին միաժամանակ, սակայն, ցավոք, իշխանությունն ամեն ինչ արեց, որպեսզի դա անհնարին լինի: Հայերեն ձեռագրերի վրա ես ստիպված էի աշխատել բանտում՝ համակարգչի եւ այլ տեխնիկական միջոցների բացակայության պայմաններում: Ես հնարավորություն չունեի շփվելու թարգմանիչների հետ, ինչը խիստ կարեւոր էր նրանց կողմից հեղինակի ինդիվիդուալ հատկությունները հասկանալու համար: Չնայած այդ դժվարություններին՝ գիրքը հրատարակված է, եւ ես շնորհակալ եմ բոլորին, ով մասնակցեց դրա պատրաստմանը: Ինչպես գիտեք, գրքում վերարտադրված է բազմամյա անցյալի իրադարձություններ եւ նկարագրված են դրանք այն ժամանակների ընկալման տեսակետից», - նամակում նշել է ՀՀ երկրորդ նախագահը եւ մանրամասնել, որ գրքի առաջին մասը մեր պատմության հերոսական էջերի եւ այդ էջերը կերտող մարդկանց մասին է:

Այնուհետեւ Ռ. Քոչարյանն անդրադարձել է արցախյան հաղթանակին եւ ընդգծել. «Մեր հաղթանակը Ղարաբաղում ինչ-որ կանխորոշված բան չէր, հակառակը՝ հաջողության հասնելու հնարավորություն մենք շատ քիչ ունեինք: Հենց դրանով էլ ավելի արժեքավոր են մեր ձեռքբերումները, եւ այդ իսկ պատճառով ավելի պատասխանատու կերպով պետք է վերաբերենք դրանց այսօր: Կարեւորագույն ճակատագրական որոշումներ ընդունելիս մենք ավելի կուռ էինք, ավելի վճռական, խիզախ եւ արագ, քան մեր թշնամիները: Այդ իսկ պատճառով մեզ հաջողվեց հաղթել թշնամուն, որը զգալիորեն գերազանցում էր մեզ մարդկային եւ նյութական ռեսուրսներով: Սակայն, որպեսզի պահեինք եւ ամրապնդեինք ռազմական հաջողությունը, պետք էր կառուցել ուժեղ եւ դինամիկ զարգացող Հայաստան, որն ի վիճակի է ապահովել պաշտպանության բանակի մարտունակության ռեսուրսային ապահովումը եւ Արցախի պետականության կայացումը: Սրան է նվիրված գրքի երկրորդ մասը, որտեղ նկարագրված է, թե ինչ ջանքերով հաջողվեց ապահովել Հայաստանի տնտեսության երկնիշ զարգացման տեմպը եւ 10 տարում հասնել ՀՆԱ-յի հնգակի եւ բյուջեի 8 անգամից ավելի աճի, ինչպես էին իրագործվում հայկական հասարակության կենսագործունեության բոլոր կողմերին առնչվող եւ Հայաստանի պատկերը փոխած ֆունդամենտալ բարեփոխումները: Ինչպես նաեւ նրա մասին է, թե ինչպես ես հեռացա իշխանությունից՝ հաջողության գագաթնակետին գտնվելով»:

Եզրափակելով խոսքը՝ նամակում Ռ. Քոչարյանը շեշտել է. «Հարգելի՛ բարեկամներ, հուսով եմ, որ այն իրադարձությունները, որոնք նոր գրքի նյութ են դառնալու իրենց երկար սպասեցնել չեն տա: Շնորհակալ եմ ձեզ ձեր ուշադրության եւ աջակցության համար:

Աղբյուրը՝ iravunk.com

loading...