Այսօր՝ մարտի 25-ին, ՀՀ վարչապետ Նիկոլ Փաշինյանն, անդրադառնալով կրթական համակարգին, խոսեց նաև այն ռեկտորների մասին, ովքեր կուսակցականացրել են ՀՀ-ում գործող բուհերը։
«Պետք է շատ հստակ ասենք՝ այն ռեկտրոները, որոնք բարձրագույն կրթական համակարգը դարձրել են ինչ-որ կուսակցական բջիջներ, այն ռեկտորները, որոնք ուսանողների վրա դռներ են փակել, նոր Հայաստանում անելիք չունեն: Սա իմ հստակ դիրքորոշումն է: Մենք չպետք է վախենանք այդ դիրքորոշումը հայտնել: Թող դռները ճանկռեն, իրենց սեղաններից ու բազկաթոռներից ճանկռեն, բայց նոր Հայաստանում անելիք չունեն: Թող գնան իրենց համար գտնեն այլ աշխատանք, անելիք, առաքելություն»,-հայտարարեց վարչապետը։
Ամենայն հավանականությամբ վարչապետի կոչն ուղղված էր ԵՊՀ ռեկտոր Արամ Սիմոնյանին, ում հրաժարականին կողմ է նաև ԵՊՀ հոգաբարձուների խորհրդի նորընտիր նախագահը։
«Հեղափոխությունը սկսել է այս պահանջով ու ավարտվելու է այս պահանջով, չկա տարբերակ, սա քաղաքական որոշում է ու այդ որոշումը մի շաբաթ այս կողմ, մի շաբաթ այն կողմ կիրականացվի, որևէ մեկը հանկարծ չմտածի, թե մենք կմոռանանք ինչի համար ենք հավաքվել, հույս չունենան», - հավելեց Նիկոլ Փաշինյանը։
Տպավորություն է, որ վարչապետը նույնպես ԵՊՀ 100-ամյակն առանց Արամ Սիմոնյանի է պատկերացնում և այդ ուղղությամբ փաստացի սկսել է ջանքեր գործադրել։
Վաչիկ Գրիգորյան