ԱԺ «Իմ քայլը» խմբակցության պատգամավոր Լուսինե Բադալյանն իր Facebook-յան էջում կատարել էր գրառում, որում տեղ գտած դիտարկումները խիստ տարընթերցումների տեղիք տվեցին։ Մասնավորապես՝ Բադալյանը նշում էր, որ իրենց քաղաքական ուժն է ազատազրկել Ռոբերտ Քոչարյանին, որի հետևանքով մի շարք լրատվամիջոցներ վերածվել են քարոզչամեքենայի։ Լուսինե Բադալյանի կարծիքը մասամբ կիսում է նաև «Իմ քայլը» խմբակցության մեկ այլ պատգամավոր Արմեն Խաչատրյանը, այս մասին, ArmDay.am-ի հարցին ի պատասխան, ասաց նախկին ոստիկանը։
«Նա հենց այնպես չի արտահայտել իր կարծիքը, և գտնում եմ, որ շատերը համակարծիք են նրա հետ։ Կան բազմաթիվ լրատվամիջոցներ, որոնք ոչ թե լրատվություն են մատուցում, այլ քարոզչությամբ են զբաղվում»,-ասաց նա։
ArmDay․am-ի հարցին` արդյո՞ք այդպիսիք չեն միայն Բադալյանի նշած լրատվամիջոցները, Խաչատրյանը պատասխանեց,-«Դա նրա կարծիքն է, ես այլ կարծիք ունեմ տարբեր լրատվամիջոցների և լրագրողների մասին, սակայն այն, որ գոյություն ունի նման երևույթ, դա միանշանակ է»։
Մեր մյուս հարցին, թե ինքն էլ է կարծու՞մ, որ իրենց քաղաքական ուժն է ազատազրկել Ռոբերտ Քոչարյանին, պատգամավորը պատասխանեց հարցով՝ այսինքն այսօր բոլոր ազատազրկման մեջ գտնվող անձանց մեր քաղաքական ու՞ժն է ազատազրկել։ Մեր դիտարկմանը՝ Ձեր թիմակիցն է բառացի այպես արտահայտվել, պատգամավորը պատասխանեց,-«Չգիտեմ»։
Հատկանշական է, որ Արմեն Խաչատրյանը առաջիններից էր, որ համաձայնվել էին Լուսինե Բադալյանի գրառման հետ։ Ավելին՝ Խաչատրյանի կարծիքով Բադալյանը շատերի փոխարեն է արտահայտվել, և այս ամենի ֆոնին տարօրինակ է, որ մեզ հետ զրույցում Խաչատրյանը չի համաձայնվում գրառման մեջ տեղ գտած երկու առանցքային դիտարկումների հետ՝ կապված Ռոբերտ Քոչարյանի և լրատվամիջոցների անվանումների հետ, և փաստացի հակասում է ինքն իրեն։
Ստորև ներկայացնում ենք Արմեն Խաչատրյանի մեկնաբանությունը Լուսինե Բադալյանի Facebook-յան գրառման տակ․
Վաչիկ Գրիգորյան
