Քննչական կոմիտեն բացահայտել է 34-ամյա տղամարդու դանակահարության դեպքը


Քննչական կոմիտեն բացահայտել է 34-ամյա տղամարդու դանակահարության դեպքը
Փետրվար 20 18:20 2019

ՀՀ քննչական կոմիտեի  Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում քննվող քրեական գործի շրջանակներում բացահայտվել է 34-ամյա տղամարդու դանակահարության դեպքը: Առերևույթ հանցագործություն կատարելու կասկածանքով ձերբակալվել է մեկ անձ: Այս մասին  տեղեկացրին ՀՀ քննչական կոմիտեի դեպարտամենտի տեղեկատվության և հասարակայնության  հետ կապերի բաժնից՝ հավելելով. «Նախնական տվյալներով՝ 2019թ. փետրվարի 19-ին՝ ժամը 04։35-ին, բժշկական կենտրոններից մեկից ՀՀ ոստիկանության Էրեբունու բաժին ահազանգ է ստացվել այն մասին, որ «կրծքավանդակի ձախ կեսի կտրած-ծակած թափանցող վերք, ձախակողմյան պնևմաթորաքս» ախտորոշմամբ շտապօգնության թիվ 43-րդ խումբն իրենց մոտ է տեղափոխել 1985 թվականին ծնված մի քաղաքացու:

Ահազանգից անմիջապես հետո հիվանդանոց է մեկնել օպերատիվ-քննչական խումբը։ Զննության է ենթարկվել հիվանդանոցի ընդունարանի մատյանը, առգրավվել են տուժողի  հագին եղած հագուստները։

Դեպքի առթիվ ՀՀ ՔԿ ԵՔՔՎ Էրեբունի և Նուբարաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով:

Կատարված անհետաձգելի քննչական գործողությունների և օպերատիվ-հետախուզական միջոցառումների արդյունքում պարզվել է հանցագործության կատարման վայրը, շարժառիթը, մասնակիցների շրջանակը։

Նախաքննության ընթացքում պարզվել է, որ 34-ամյա տղամարդը ծանր մարմնական վնասվածքն ստացել է իր ծանոթի՝ Երևան քաղաքի 21 ամյա բնակչի կողմից՝ Երևան քաղաքի Միչուրինի փողոցի տներից մեկում կենցաղային հարցերի շուրջ ծագած վիճաբանության ժամանակ:

Հանցագործությունը կատարելու կասկածանքով 2019 թվականի փետրվարի 19-ին ՀՀ ոստիկանության Էրեբունու բաժին է բերման ենթարկվել Երևան քաղաքի՝ 1998 թվականին ծնված բնակիչը: Վերջինս ձերբակալվել է:

Նշանակվել են դատաբժշկական, դատակենսաբանական և դատահետքաբանական փորձաքննություններ։

Հանցագործության գործիք դանակը հայտնաբերելու համար հետաքննության մարմնին տրվել է հանձնարարություն։

Նախաքննությունը շարունակվում է։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքովսահմանված կարգով` դատարանի` օրինական ուժի մեջ մտած դատավճռով»:



loading...