Համացանցում տարածվել է գտել տաղանդավոր գրող, թարգմանիչ, հրապարակախոս Սամվել Մկրտչյանի եւ նրա կնոջ՝ քաղաքական գործիչ Նաիրա Զոհրաբյանի երիտասարդ տարիների լուսանկարը։ Լուսանկարի հեղինակը Գերման Ավագյանն է։ Այն ուղեկցվում է Սամվել Մկրտչյանի խոսքերով.
Ես Ջոն Լենոնը չեմ
Բայց ամեն օր ապրում եմ կյանքի ու մահվան սահմանագծին.
Ու էս աղջիկը` մոնղոլ-թաթարի իր շեղ աչքերով
Ում սիրում եմ հավերժ` ինչպես Դրակուլան
Ինձ համար ամեն օր մահվան ու կյանքի էդ սահմանագիծն է.
Ես Լենըրդ Քոհենը չեմ, բայց այս աղջիկը, ով ամեն օր պատռում է իմ սիրտը
Անգամ այս սրտով ես ասում եմ` հպվիր ինձ քո մերկ ձեռքերով։
Ես Լյուցիֆերը չեմ, բայց լինում է պահ, որ ուզում եմ թաղել էս աղջկան, փակել շեղ աչքերն ու հող լցնել վրան
Որ ազատագրեմ ինքս ինձ քսանամյա էս գերությունից, որ մահապատժից վատ է։
Ու հաջորդ պահին, ինչպես Ջոն Դոնը, ուզում եմ ասել՝ «Ախ, մի մահանա, թե չէ ես կատեմ աշխարհն ու կանանց, երբ դու հեռանաս»։
Իմ ընկերը ասում է` մի օր իր սեւ մազերի պարանով ինձ կախելու է։
Ես նայում եմ սեւ մազերի պարանին ու ասում եմ իմ լավ ընկերոջը՝
Գիտեմ, որ անելու է, բայց ես էս աղջկան սիրում եմ։
Հիմա գնում եմ էս աղջկան ճանապարհելու Փարիզ՝ իր հերթական տափակ նիստին։
Ու հետ դառնալուց հիշում եմ Դիլըն Թոմասին, որ ասում էր՝ «Գժվիր, գժվիր, որ այս լույսը չմարի»։
Նշենք, որ Սամվել Մկրտչյանի շնորհիվ հայ ընթերցողը հնարավորություն է ստացել հայերենով կարդալ համաշխարհային գրականության խոշոր դեմքերի ստեղծագործություններ։ Նա կյաքնից հեռացել է 2014թ.-ին։ Տաղանդավոր հայն ընդամենը 55 տարեկան էր։
Լուսանկարն ու տողերը ֆեյսբուքյան էջում տեղադրել է Ophelia Simonyan անունով օգտատերը։
