«Առավոտ» թերթը գրում է. ««Հավաստիացնում եմ Ձեզ, որ բոյկոտ չկա Ռուսաստանի հայ գործարարների կողմից: Ես կարծում եմ, որ միայն խոշոր գործարարներին չպետք է ներգրավել այս գործընթացում, այլ այնտեղ ապրող 3 միլիոն հայությանը»,- երեկ այս մասին լրագրողների հետ հանդիպմանն ասաց «Հայաստան» համահայկական հիմնադրամի տնօրեն Հայկակ Արշամյանը՝ պատասխանելով լրագրողների այն հարցին, թե մամուլում շրջանառվում էր, որ ՌԴ-ի հայազգի խոշոր գործարարներ բոյկոտել են հեռուստամարաթոնը:
Արշամյանն ասաց, որ հիմնադրամին, բացի գործարար Սամվել Կարապետյանից, նվիրատվություն է արել նախկին վարչապետ, Եվրասիական տնտեսական հանձնաժողովի նախագահ Տիգրան Սարգսյանը' 100 հազար ռուբլի, ՌԴ-ից նվիրատու էլ՝ Աշոտ Խաչատրյանը, 100 հազար դոլար է նվիրաբերել հիմնադրամին: Հայկակ Արշամյանի խոսքով` այս դրամահավաքով չեն ավարտվելու աշխատանքները, թվերն ավելանալու են, փորձելու են գնալ Ռուսաստան, Ուկրաինա.
«Նաև Միջին Ասիայում մեծ պոտենցիալ կա, հենց նույն Ղազախստանում և Թուրքմենստանում, ուստի չի կարելի նրանց անտեսել»: Հայկակ Արշամյանը վստահեցրեց՝ այսօր որևէ քաղաքական կուսակցություն չի կարող ազդեցություն ունենալ հիմնադրամի վրա, թեև ինքը ունի համակրանք ներկայիս իշխանության անդամների նկատմամբ, ինքն անկուսակցական է, և հիմնադրամը՝ ապաքաղաքական:
Aravot.am-ի հարցին՝ արդյոք հիմնադրամում կլինե՞ն խոշոր բացահայտումներ՝ ֆինանսական չարաշահումներ (բացի նախկին տնօրենի դեպքից), ինչպես որ տարբեր գերատեսչություններում է լինում, Հայկակ Արշամյանը պատասխանեց. «Հաշվեքննիչ պալատը ոաումնասիրություններ է կատարում հիմնադրամում, հիմնականում ավարտվել է: Քննություններ են կատարվում կապալառուների հետ, հիմնադրամի գործընկերների հետ»:
Ընդ որում, Հաշվեքննիչ պալատը, ըստ Արշամյանի, երբեք հիմնադրամում ուսումնասիրություն չի կատարել, սա առաջին անգամ է: Արշամյանը վստահեցրեց՝ պալատը ստուգում է հիմնադրամի վերջին 10 տարվա գործունեությունը. «Ավելի խորն ուսումնասիրելու են վերջին մի բանի տարվա գործունեությունը: Հունվարի վերջին, հույս ունենք, արդյունքները կլինեն»: Մանրամասն՝ թերթի այսօրվա համարում։
