ԱԺ արտահերթ ընտրությունններից հետո խորհրդարան անցած ուժերը հասարակության կողմից չեն ընկալվում որպես ընդդիմություն: Թերևս դրա պատճառն այն է, որ «Լուսավոր Հայաստան» կուսակցությունն ու «Բարգավաճ Հայաստան» կուսակցությունները հեղափոխության շրջանում սատարել են Նիկոլ Փաշինյանին:
Ընդդիմության կասկածի հետ կապված մասնավորապես շեշտվում է ԲՀԿ-ի անունը:
ArmDay.am-ը այս մասին զրուցեց ԲՀԿ խմբակցության քարտուղար Վահե Էնֆիաջյանի հետ, ով նշեց, որ նման կարծիք ունեցողները շտապում են:
«Ես ցավում եմ, որ նոր իրականությունում կան այնպիսի մարդիկ, որ իրենց քաղաքագիտության փորձագետ են համարում և անբովանդակ վերլուծություններ են անում՝ հաշվի չառնելով , որ նոր Հայաստանում նոր իրողություններում նոր որակներով ԱԺ արտահերթ ընտրություններ են տեղի ունեցել: Դեռևս խմբակցությունների ամբողջական կազմերը չեն հրապարակվել և նիստ տեղի չի ունեցել, սակայն որակումներ են տալիս, թե որ քաղաքական ուժն ինչպիսի հավակնություններ է ունենալու, իչպես է իրեն դրսևորելու»,-ասաց նա:
Վահե Էնֆիաջյանն ավելի խորքային անդրադարձ չկատարեց այս հարցին, ասելով, որ նման մտքեր արտահայտող մարդիկ իրենցից շատ բան չեն ներկայացնում: