Ֆեդերացիաներին հատկացվող գումարների ավելացման մասին ծրագիր է ներկայացվել ՀՀ կառավարություն, քանի որ նախաօլիմպիական տարում անելիքները շատ են: Այս մասին մամուլի ասուլիսի ժամանակ ասաց Սպորտի նախարարի պաշտոնակատար Գաբրիել Ղազարյանը:
Նրա խոսքով՝ Հայաստանի տարվա լավագույն մարզիկը Սիմոն Մարտիրոսյանն է:
Ղազարյանն անդրադարձավ նաև Հայաստանի բռնցքամարտի ֆեդերացիայի հետ կապված հարցերին և նշեց, որ նախարարությունը որևէ կողմի չի պաշտպանում, այլ կողմնակից է հարցերն օրենքի շրջանակում լուծելու:
Հայկական սպորտում և ֆուտբոլում կարևորագույն հարցերից մեկի` նախկին «Միկա», ներկայիս ՄԶՀՀԿ ՕԱԿ-ի հարցին Ղազարյանը նույնպես անդրադարձավ. «Մարզահամալիրը 2019 թվականից դառնալու է ՓԲԸ և կարող է համագործակցել ցանկցացած կազմակերպության հետ: Իսկ նախկին «Միկայի» մարզադահլիճի թեմայով, որտեղ ինչպես հայտնի է բասկետբոլի Հայաստանի հավաքականը չի կարող անցկացնել եզրափակիչ փուլի հանդիպումներ, Ղազարյանն ասաց, որ այդ հարցը ևս ուշադրության կենտրոնում է և ծավալվում են քննարկումներ:
Գաբրիել Ղազարյանն անդրադարձավ ԱԺ ընտրություններին մասնակցող մարզիկներին և պատասխանեց հարցին, արդյո՞ք նրանք օգուտ կտան սպորտին։
«Յուրաքանչյուրի անձնական իրավունքն է քաղաքականությամբ զբաղվելը։ Ես չգիտեմ, թե մարզաշխարհի ներկայացուցիչների՝ ԱԺ-ում հանդես գալն ինչ օգուտ կտա, բայց իմ սուբյեկտիվ կարծիքով պետք է օգուտ տա»։
Հիշեցնենք, որ ԱԺ ընտրություններին առաջադրվել են Արսեն Ջուլֆալակյանը և Առաքել Միրզոյանը։
