ՀՀ կրթության և գիտության նախարարությունում նոյեմբերի 12-ին կայացավ «Տարվա լավագույն ուսուցիչ», «Տարվա լավագույն տնօրեն», «Տարվա լավագույն դաստիարակ» մրցույթների հաղթողների պարգևատրման արարողությունը:
Միջոցառմանը ներկա են եղել ՀՀ կրթության և գիտության նախարարի պաշտոնակատար Արայիկ Հարությունյանը, ՀՀ պաշտպանության նախարարի պաշտոնակատար Դավիթ Տոնոյանը:
Արայիկ Հարությունյանի խոսքով` հեղափոխությունից հետո նախարարության աշխատակիցները այս մրցանակաբաշխության մասին երկար են մտածել` արդյոք այն ծառայո՞ւմ է իր նպատակին, և արդյոք այն խնդիրները, որոնք դրված են նախարարության առջև, իրագործվո՞ւմ են նաև այս մրցանակաբաշխության միջոցով:
«Մենք գտանք, որ սա շատ կարևոր միջոցառում է և կարևոր է այն համատեքստում, որ մենք մեր աշխատանքի միջոցով հետևողականորեն պետք է ամեն ինչ անենք՝ բարձրացնելու ուսուցչի վարկանիշը և հեղինակությունը: Ուսուցիչը և տնօրենը մեր ամենակարևոր գործընկերներն են դպրոցում՝ մեր ծրագրերը իրագործելիս: Առանց ձեր օգնության և ակտիվ միջամտության մենք այդ ծրագրերը պարզապես չենք կարողանա իրագործել: Առիթ եմ ունեցել ասելու, որ դուք մեր ամենաառաջին և ամենակարևոր գործընկերն եք մեր ծրագրերը իրականացնելու հարցում, և մենք ամեն ինչ անելու ենք, որպեսզի այդ գործընկերային հարաբերությունները ստացվեն ,և կարողանանք այնպիսի միջավայր ստեղծել, որ դպրոցից դուրս գա Հայաստանի Հանրապետության ազատ, անկախ, վերլուծող, քննադատող և քննող քաղաքացի»,- ասաց Հարությունյանը՝ շնորհավորելով մրցանակակիրներին:
Նախարարը նշեց, որ այս տարի նախարարությունը բողոքներ չի ստացել՝ կապված մրցանակաբաշխության հետ և մրցանակակիրների որոշելու հետ:
2018 թվականի «Տարվա լավագույն դաստիարակ» անվանակարգում հաղթող է ճանաչվել Աշտարակի Արաքս Մուրադյանի անվան մանկապարտեզի դաստիարակչուհի Գոհար Արշակյանը, «Տարվա լավագույն տնօրեն» անվանակարգում հաղթել է Վաղարշապատի Մաքսիմ Գորկու անվան ավագ դպրոցի տնօրեն Գայանե Սաֆարյանը, իսկ տարվա «Տարվա լավագույն ուսուցիչ» անվանակարգում հաղթող է ճանաչվել Աշտարակի Սմբատ Շահազիզի անվան համար 2 հիմնական դպրոցի ուսուցչուհի Նարինե Մեսրոպյանը:
Միջոցառման ընթացքում մարտական հերթապահություն իրականացնող զորամասերի լավագույն զինվորների ուսուցիչներին պարգևներ հանձնեց Պաշտպանության նախարարի պաշտոնակատար Դավիթ Տոնոյանը:
ՊՆ նախարարի պաշտոնակատարը նշեց, որ Պաշտպանության նախարարությունը առանձին կազմակերպում էր նմանատիպ միջոցառում ՊՆ-ում, սակայն այս անգամ, ԿԳՆ նախարարի պաշտոնակատարի հետ խորհրդակցելով, որոշում են կայացրել Կրթության և գիտության նախարարության հետ կազմակերպել այս միջոցառումը:
«Կրթությունը, պաշտպանությունը, դաստիարակությունը տեսնում ենք մեկ միասնական համակարգում: Այդ իսկ պատճառով նպատակահարմար ենք գտնում և ճիշտ ենք համարում, որպեսզի այն զինվորներին, ովքեր անսասան պաշտպանում են մեր առաջնագիծը, կանգնած են Հայաստանի Հանրապետության ու հայ ժողովրդի անվտանգության ապահովման գործին և վտանգում են իրենց կյանքը: Դա մեր ուսուցիչների աշխատանքի շնորհիվ է` իրենց ճիշտ կրթելու դաստիարակելու, ձևավորելու որպես հայ քաղաքացի: Պաշտպանության նախարարությունը աշակերտներին, այսպես ասած, վերցնում է իր հարկի ներքո 18 տարեկանը լրանալուց հետո, մինչև 18 տարեկանը դուք ամենօրյա ձեր աշխատանքի շնորհիվ ձևավորում եք Հայաստանի Հանրապետության քաղաքացուն, ով պատրաստ է կատարելու այդ խնդիրը»,- ընդգծեց Տոնոյանը:
Ամփոփիչ հանրապետական փուլին այս տարի մասնակցել է 32 մանկավարժ` Հայաստանի 9 մարզերից, Երևանից և Կրթության ու գիտության նախարարության ենթակայությամբ գործող ուսումնական հաստատություններից: ՀՀ կրթության և գիտության նախարարի հրամանով ստեղծված մրցութային հանձնաժողովները փակ քվեարկությամբ` ձայների պարզ մեծամասնությամբ ընթացիկ տարվա սեպտեմբերի 25-ին ամփոփել են արդյունքները և ընտրել հաղթողներին, որոնց անունները հրապարակվել են պարգևատրման արարողության ժամանակ:
«Տարվա լավագույն ուսուցիչ», «Տարվա լավագույն տնօրեն» և «Տարվա լավագույն դաստիարակ» մրցույթները կազմակերպվում են սկսած 2000 թվականից: Հաղթողները նույն մրցույթին կրկին կարող են մասնակցել 5 տարի անց:
