Հայաստանի Հանրապետության ոստիկանության պետ Վալերի Օսիպյանը գոհ է համակարգի յուրաքանչյուր ծառայողի աշխատանքից: Ինչպես հաղորդում է «Արմենպրես»-ը, ոստիկանության պետն այս մասին ասաց կառավարության նիստից հետո լրագրողների հետ զրույցում:
«Այն, որ ոստիկանությունն այսօր տարբերվում է, դա միանշանակ է: Այսօր միայն ու միայն ուժեղ բանիմաց ոստիկանության արդյունքում մենք ունեցանք Երևանի ավագանու լավ ընտրություններ: Այսօր կան կարծիքներ, որոնք տարբերվում են: Դրանք քիչ են, բայց կան: այդպիսով փորձում են ցեխ շպրտել մեր ոստիկանության վրա, բայց ես, լինելով այդ կառույցի ղեկավարը, գոհ եմ համակարգի յուրաքանչյուր ծառայողի աշխատանքից: Նույնը չէի կարող ասել մայիս-հունիս ամիսներին, սակայն հիմա ոստիկանությունը լավ է կատարում իր առջև դրված խնդիրները»,- ասաց ՀՀ ոստիկանության պետը:
Նա հավելեց, որ Երևանի ավագանու ընտրությունների, Ֆրանկոֆոնիայի գագաթնաժողովի օրերի ընթացքում ոստիկանության իրականացրած ծառայությունը վկայում է այն մասին, որ Հայաստանն ունի պրոֆեսիոնալ ոստիկանություն:
