Փաշինյանը հնարավոր չի համարում Վովա Գասպարյանի նշանակումը


Փաշինյանը հնարավոր չի համարում Վովա Գասպարյանի նշանակումը
Հոկտեմբեր 17 13:38 2018

Անդրադառնալով Սյունիքում բողոքի ակցիային ընդդեմ նորանշանակ մարզպետ Հունան Պողոսյանի` ՀՀ վարչապետի ժամանակավոր պաշտոնակատար Նիկոլ Փաշինյանը լրագրողների հետ հանդիպմանն ասաց․- «Դա սյունեցիները չէին, մեր կուսակցության անդամներին էին ճանապարհը փակել»: Հարցին, թե ինչու են սկանդալային դեմքերը նշանակվում պաշտոնների, Փաշինյանը հարցով պատասխանեց. «Ինչից եք տարբերում սկանդալային և ոչ սկանդալային դեմքերը»:

Վարչապետի պաշտոնակատարը նշեց, որ նոր փուլ են մտնում, կա բարիկադները կառուցելու ժամանակը և կա դրանք ապամոնտաժելու ժամանակը: «Մենք հիմա մտել ենք բարիկադները ապամոնտաժելու ժամանակ, և այստեղ Հունան Պողոսյանի անձի խնդիրը չէ: Այստեղ քաղաքական ուղերձի խնդիրն է, և այդ քաղաքական ուղերձը մեր այն է, որ մենք թշնամիների, մերոնքականների և ձերոնքականների չենք նշանակելու: ՀՀ-ում անթերի մարդիկ չկան, ես չեմ հիշում որևէ նշանակում, որ որևէ բացասական արձագանք չստանա: Մեկը երիտասարդ է, մեկը շատ տարիքով է, մյուսը բոյով է, երրորդը… այսինքն՝ անթերի մարդիկ ՀՀ-ում չկան և անթերի նշանակումներ չեն լինի: Խնդիրը հետևյալի մասին է՝ մենք պետք է շատ հստակ ուղերձներ հղենք, որ մենք պատրաստվում ենք համախմբել ողջ ներուժը: Հիամ խոսվում է, որ այս պաշտոնյան սա է արել, այն պատոնյան նա է արել: Ով ինչ արել է, յուրաքանչյուրն իր արածի համար պատասխան կտա, կապ չունի՝ նա պաշտոնյա է, թե չէ: Անցել են այն ժամանակները, երբ պաշտոնյա լինելը նշանակում է արտոնություն օրենքի առաջ ունեցած հավասարության իմաստով, չկա այդպիսի արտոնություն”,- ասաց Նիկոլ Փաշինյանը:

Փաշինյանը հավելեց նաև, որ տեսականորեն հնարավոր է նաև ՀՀԿ անդամները մաս կազմեն կառավարությանը: Հիմա էլ, ըստ Փաշինյանի, ՀՀԿ անդամներ կան կառավարությունում:

Այն հարցին, թե ո՞րն է է այն գիծը, որ կտարանջատի, թե որ նախկին պաշտոնյաները կարող են նորից պաշտոններ զբաղեցնել, օրինակ, նախկին ոստիկանապետ Վլադիմիր Գասպարյանը կարո՞ղ է նորից պաշտոնի նշանակվել: Վլադիմիր Գասպարյանի մասով Փաշինայնն ասաց՝ ոչ, հնարավոր չէ:«Այդ գիծը մեր հայեցողությունն է, կառավարության հայեցողությունն է: Եթե վարչապետի կողմից նշանակվող անձ է, ուրեմն վարչապետի հայեցողությունն է, և վարչապետը պետք է կրի քաղաքական պատասխանատվություն»,- ասաց Փաշինյանը:



loading...