Ռուսաստանի առողջապահության նախարարությունն առաջարկում է գործատուներին հնարավորություն ընձեռել ավելացնել ծխողների աշխատանքային օրվա ժամանակն այնքան, որքան նրանք ծախսում են ծխելու համար: RNS-ի փոխանցմամբ՝ նման առաջարկ է ներառված ՌԴ առողջապահության նախարարության պատրաստած 2017-2022 թվականների հակածխախոտային հայեցակարգում:
«Գործատուին հնարավորություն տալ ավելացնել աշխատողի աշխատանքային ժամերը՝ ծխելու համար նրա ծախսած ժամանակին համապատասխան»,- ասված է փաստաթղթում:
Հայեցակարգը նաեւ առաջարկում է անընդմեջ բարձրացնել ծխախոտային արտադրանքի հարկերը՝ հասցնելով Առողջապահության համաշխարհային կազմակերպության՝ Եվրոպական տարածաշրջանի երկրներում հարկման մակարդային: Առաջարկվում է նաեւ սովորական եւ էլեկտրոնային սիգարետի մանրածախ առեւտրի՝ ապրանքի 10%-ի չափով հարկ սահմանել, իսկ գումարներն ուղղել մարզային բյուջեներ:
Ավելի վաղ լրատվամիջոցները հաղորդել էին, որ առողջապահության նախարարությունը ցանկանում է արգելել 2014 թվականից հետո ծնվածներին ծխախոտի վաճառքը:
