ՀԱՕԿ նախագահ Գագիկ Ծառուկյանն այսօր ընդունեց օրերս Իտալիայում ավարտված ծանրամարտի U15 եւ U17 Եվրոպայի առաջնության մասնակից Հայաստանի տղաների եւ աղջիկների հավաքականներին, որոնք, ընդհանուր առմամբ նվաճել են 24 մեդալ՝ 17-ը ոսկե: ՀԱՕԿ նախագահը շնորհակալություն հայտնեց մարզիչներին արդյունավետ աշխատանքի համար, իսկ ծանրորդներին հորդորեց շարունակել մարզվել նույն տքնաջանությամբ, ինչը նրանց նոր հաղթանակներ ու մեդալներ կբերի ընդհուպ մինչեւ օլիմպիական խաղերի:
Այնուհետեւ, Գագիկ Ծառուկյանը ոլորտի ներկայացուցիչներին տեղեկացրեց, որ մարզերում տարեկան մի քանի մարզադպրոց կառուցելու մտադրություն ունի: Իսկ երբ ՀԾՖ գլխավոր քարտուղար, տղամարդկանց ազգային հավաքականի գլխավոր մարզիչ Փաշիկ Ալավերդյանն ասաց, որ տարիներ շարունակ հայկական ծանրամարտի գլխավոր դարբնոցը Գյումրին է, պարոն Ծառուկյանը հայտարարեց. «Այսօր բոլորիդ ներկայությամբ հայտարարում եմ, որ եկող տարվա գարնանը Գյումրին նոր ու ժամանակակից մարզադպրոց կունենա»:
Աշոտ ՀԱԿՈԲՅԱՆ
