Մոսկվայի «Արարատ» ֆուտբոլային ակումբի ավագ մարզիչ և առաջին փոխնախագահ Պողոս Գալստյանը հաստատել է,որ ակումբը տեղափոխվում է Հայաստան.
«Արարատը», հիշեցնենք, դարձել է պրոֆեսիոնալ ֆուտբոլային լիգայի հաղթող, սակայն առաջին փորձից չի կարողացել լիցենզիա ստանալ ֆուտբոլի ազգային լիգայում հանդես գալու համար (ՖԱԼ).
«Այո, «Արարատն» իսկապես տեղափոխվում է Հայաստան:
Սա կապված է լիցենզիա չստանալու հետ: Մենք կփորձենք բողոքարկել, բայց ակումբի ղեկավարությունն արդեն հայտնել է տղաներին, որ մենք տեղափոխվում ենք»,- Գալստյանի խոսքերն է փոխանցում «Чемпионат»-ը:
Պողոս Գալստյանը նաև հայտնել է, որ իրենք ստիպված կլինեն փոփոխություններ մտցնել կազմի մեջ, քանի որ շատ ֆուտբոլիստներ չեն ցանկանում հեռանալ Ռուսաստանից.
«Իհարկե, ցավալի է, որ այսպես ստացվեց, բայց սա սպորտ է: Մեզ` ֆուտբոլային մարդկանց համար կարևորն այն է, որ մենք աշխատենք ֆուտբոլում: Իսկ թե որտեղ` արդեն այնքան էլ կարևոր չէ»,- ասել է Գալստյանը:
Նա նաև հայտնել է, որ ակումբը Հայաստանի առաջնությունում հանդես կգա «Արարատ Հայաստան» անվանման ներքո: