Սա կոչվում է պետական ահաբեկչություն. Արթուր Սաքունց


Սա կոչվում է պետական ահաբեկչություն. Արթուր Սաքունց
Փետրվար 23 12:28 2018

Հելսինկյան քաղաքացիական ասամբլեայի վանաձորյան գրասենյակի ղեկավար Արթուր Սաքունցն ասում է, որ «մարտի 1»-ի իրավական գնահատականը մինչև հիմա տրված չէ: Սա, ըստ նրա, անպատժելիության համակարգի մատնանիշն է: ««Մարտի 1»-ի գործողությունների հիմնական պատասխանատուն հանդիսանում է այսօրվա իշխանությունը»,-այսօր այս թեմայով «Ելքի» նախաձեռնած խորհրդարանական լսումներին հայտարարեց նա:

Ըստ նրա՝ զանգվածային անկարգություններ տեղի չեն ունեցել, և դատախազությունը շարունակում է այդ պնդումը: «Տեղի է ունեցել զանգվածային ոճրագործություն քաղաքական ընդդիմության նկատմամբ»,-հավելեց նա:

Նա նկատեց, որ այս իրադարձությունների վերաբերյալ չկա մի միջազգային կազմակերպություն, որի անդամն է ՀՀ-ը, որում այս մասին զեկույցներ ու փաստաթղթեր ներկայացված չլինեն: «Դատախազությունն առանձնացնումէ առանձին սպանվածների գործերն, ուսումնասիրություններ ներկայացնում, կարծես թե դրանով ամեն ինչ ավարտվելու է: Չի ավարտվում, սխալվում եք»,-ասաց Արթուր Սաքունցը: «Չկա քաղաքական կամք, ցանկություն՝ իրավական գնահատական տալու՝ իշխանության կողմից քաղաքական ընդդիմության նկատմամբ կատարված հետապնդումներին, ահաբեկչությանը: Սա կոչվում է պետական ահաբեկչություն»,-հավելեց նա:

Սաքունցն ընդգծեց, որ քանի դեռ հաշտվում ենք «մարտի 1»-ի հանցագործությանն իրավական գնահատական չտալուն, խոցելի է նաև Ազգային ժողովը:



loading...