Դա կեղտոտ սադրանք է. Ուկրաինայի հայերի ազգային կոնգրեսի նախագահն ու Ուկրաինայում Հայաստանի դեսպանը անդրադարձել են ադրեբջանական քարոզչության հերթական ձախողմանը


Դա կեղտոտ սադրանք է. Ուկրաինայի հայերի ազգային կոնգրեսի նախագահն ու Ուկրաինայում Հայաստանի դեսպանը անդրադարձել են ադրեբջանական քարոզչության հերթական ձախողմանը
Հունվար 10 12:12 2017

Ուկրաինայի հայերի ազգային կոնգրեսի նախագահ Աշոտ Ավանեսյանը ադրբեջանական լրատվամիջոցներում հրապարակված հարցազրույցը կեղծիք է անվանել:

«Հունվարի 9-ին ադրբեջանական լրատվամիջոցներում հրապարակվել է իբր ինձ հետ արված հարցազրույց, որտեղ նշվել են բացարձակ կեղծ դրույթներ: Ամենայն պատասխանատվությամբ հայտարարում եմ, որ դա կեղծ հարցազրույց է, դա կեղտոտ սադրանք է: Լեռնային Ղարաբաղի Հանրապետության (Արցախի) և Հայաստանի Հանրապետության անկախությունն ու անվտանգությունը ցանկացած հայի համար եղել է, կա և կլինի բարձրագույն արժեք՝ անկախ նրա ծննդավայրից կամ բնակավայրից: Միայն նշված պայմանների ապահովման դեպքում է հնարավոր հակառակորդ կողմի հետ հետագա փոխզիջումների մասին խոսել: Շատ կուզենայի հասկանալ՝ ինչու և ում է անհրաժեշտ այդ կեղծ լրատվությունը, որի մասին ամենևին տեղյակ չեմ»,-ֆեյսբուքյան իր էջում գրել է Ավանեսյանը:

Ադրբեջանական քարոզչության հերթական ձախողմանն անդրադարձել է նաև Ուկրաինայում ՀՀ արտակարգ և լիազոր դեսպան Անդրանիկ Մանուկյանը:

«Այսօր ադրբեջանական ԶԼՄ-երը տարածել են կեղծ ինֆորմացիա Ուկրաինայի հայերի ազգային կոնգրեսի նախագահ Աշոտ Ավանեսյանի անունից, որտեղ նա իբր հանդես է գալիս ինչ-որ պրոադրբեջանական հայտարարությամբ: Իմ կողմից ուզում եմ բոլորին հավաստիացնել, որ ադրբեջանական ցանկացած վայ-պրոպագանդիստների փորձը սեպ խրել Ուկրաիանայի հայերի մեջ, դատապարտված են ձախողման: Ոչ հարգելի ադրբեջանական սադրիչներ, թեկուզ գլուխներդ պատին տաք, ոչինչ ձեզ մոտ չի ստացվի»,-գրել է դեսպանը՝ հղում անելով Ավանեսյանի պարզաբանմանը:

Նշենք, որ հարցազրույցը տարածել է Ադրբեջանի ԱՊԱ գործակալությունը, այնուհետև այն վերահրապարակել են ադրբեջանական այլ լրատվամիջոցներ:



loading...